Июнь вазлин 8-пи йигъан Дербент шагьриъ айи Лезги театриъ Дагъустандин культурайин лайикьлу гъуллугъчи, СССР-ин ва Урусатдин писателарин Союздин член, шаир, писатель ва таржумачи Шагьвелед Шагьмардановдин 70-йис хьпан юбилейиз ва яратмиш апIбариз бахш дапIнайи мярака кIули гъубшну.
Му серенжемдиъ Дербент шагьрин главайин заместитель Видади Зейналов, шагьрин культурайин отделин кIулин пишекар Гюльпери Мирзабалаева, республикайин жюрбежюр йишвариъ яшамиш шулайи, табасаран ва азербайжан чIалариинди бикIурайи шаирар, аьлимар, мяълийирин устадар иштирак гъахьну. Гьацира му йигъандин мярака тешкил апIбак Дербент шагьриъ дуланмиш шулайи писателин багъри Яргъил гъулан агьалйирира чпин пай кивнийи, серенжемдиъ Дербент шагьрин педагогвалин колледждин мялимарна студентарра иштирак гъахьнийи.
Мярака шагьрин депутатарин Собраниейин депутат, «Каспий» ТВ-йин кIулин директор Айваз Аьлихановдин, дилаварчи, республикайин Жямяаьтлугъ Палатайин председателин кюмекчи Айваз Рамазановдин, республикайин писателарин Союздиъ табасаран халкьдин писателарин секцияйин руководитель Сувайнат Кюребеговайин тешкиллувалиинди кIули гъубшну.
Серенжем ачмиш апIури, Айваз Мяйсумовичди Шагьвелед Шагьмардановдин яратмишариз аьхю кьимат тувну.
Хъасин гьамусдиз 14 прозайин ва шиърарин китабар чапдиан адагънайи Шагьвелед Шагьмардановдиз, мярака кIули гъабхбан бадали, Сувайнат Кюребеговайиз сягьнайиина теклиф гъапIну.
«Гъи ухьу сатIиди уч духьну, табасаран халкьдизси, Дагъустан Республикайиъ яшамиш шулайи жара халкьаризра ужуди таниш вуйи машгьур шаир, писатель, таржумачи Шагьвелед Ибрегьимовичдин улихьнаси гъубшу 70 йисандин юбилей къайд апIурахьа. Дупну ккундуки, му писателин эсерар урус, башкир ва дагъустан халкьарин чIалариз илтIикIна, Урусатдин поэзияйин антологияйиъ ва хайлин жара изданйириъ чап дапIна. Гъубшу йисан ихь ватанагьлийирикан кьюрпир вуди Ш.Шагьмардановдиз «Дагъустандин халкьдин писатель» кIуру ччвур тувну», – гъапнийи чан улхбаъ С. Кюребеговайи ва уч духьнайидар шаирин эсерарихъди таниш гъапIнийи.
Дербент шагьрин глава Хизри Абакаровдин ва шагьрин вари агьалйирин терефнаан писатель юбилейихъди тебрик апIури, главайин заместитель Видади Зейналовди гьамци гъапну: «Шаирар, писателар инсанарин рюгьярин инженерар ву. Дурари жямяаьтлугъдин арайиъ айи уьзрар гафниинди сагъ апIура, айи нукьсанваларихъди женг гъабхура. Гъийин ихь милли чIаларин аьгьвалатнан гъавриъ ади, узуз, жигьиларихьинди илтIикIну, ихь милли чIалариинди вуйи китабар урхай, пуз ккундузуз. Урус чIал – уччвуб чIал ву, думу чIалнан кюмекниинди ухьу сар-сарин гъавриъ шулахьа. Ихь милли чIалар артмиш хьпан бадали, ухьу чалишмиш духьну ккунду». Чан улхбан аьхириъ В.Зейналовди писателиз Гьюрматнан грамота ва пешкеш тувнийи.
Му йигъан табасаран театрин артистар вуйи Гюльниса Агъаевайи, Гюльнара Аьгьмедхановайи Ш.Шагьмардановдин шиърар гъурхнийи, хъа мяълийирин устадар вуйи Аьбдуллагь Мирзакеримовди, Сефьяханум Муртазаевайи, Гюльнара Аьгьмедхановайи устадвалиинди табасаран халкьдин мяълийир гъапIнийи.
Чпин удучIвну улхбариъ шаирар вуйи Гюльбика Уьмаровайи, Шюшеханум Мягьямедовайи, Аьбдулмежид Къурбановди, Минара Гьяжиевайи, «Табасарандин нурар» газатдин культурайин отделин редактор Зубайдат Шябановайи, публицист, Къазимягьямед Шабалаевди, азербайжан шаир, журналист ТIагьир Салехди, юбилей къайд апIурайирин худул риш Амина Шагьмардановайи писателин, шаирин яратмиш апIбарикан гъапну ва дугъан шиърар табасаран, урус, азербайжан чIалариинди гъурхну. Му йигъан Мягьячгъалайиан дуфнайи профессор, филологияйин илмарин доктор Сабрина Шихялиевайи писателин яратмиш апIбариз бахш дапIнайи доклад гъурхнийи.
Гьацира Айваз Рамазановди, республикайин жямяаьтлугъ палатайин член Юнус Муртузялиевди чпи писателихъди таниш гъахьи вахтнакан, дугъан яратмишарин деринваликан гъапну. Серенжемдин аьхириъ Айваз Аьлихановди Шагьвелед Шагьмардановдиз, Дагъустандин поэзияйиъ, прозайиъ лайикьлу йишв дибиснайивализ лигну, Дербент шагьрин депутатарин Советдин терефнаан Гьюрматнан грамота тувну ва чан терефнаан пешкеш багъиш гъапIну.
Серенжемдин аьхириъ Шагьвелед Ибрегьимовичди му мярака тешкил гъапIдариз ва дидиъ иштирак гъахьидариз чухсагъул мялум гъапIну.
