Июндин 17-пи йигъан, 2019-пи йисандин ГИА-йин расписаниейиин биналамиш духьну, Дагъустандиъ ЕГЭ тувбаан ишлетмиш дапIну адру йигъар ккергъну.

 

Му йигъари жюрбежюр себебариан улихьнаси кIули гъубшну асас ЕГЭ-йиз гъюз дархьидари, чарасуз вуди тувну ккуни предметариан лазим вуйи кьадар баллар гъадагъуз дархьи выпускникари, улихьна йисаритIан ЕГЭ-йиъ баллар зади гъадагъуз ккуни жигьилари имтигьян тувру.

Ишлетмиш дапIну адру сабпи йигъан географияйиан ва литературайиан имтигьнар кIули гъушнийи.
Кьюбиб имтигьнарра Мягьячгъала шагьриъ 39-пи нумрайин лицейиъ гъахьну. География – 11 ученикди, хъа литература – 71 касди тувну.

Имтигьян гъабхбан къайдайиъ дигиш’валар тIаънадар. ЕГЭ тувру пунктариъ федералин ва республикайин жямяаьтлугъ касари гюзчивал уьбхюра.

Июндин 18-пи йигъан тарихдин ва физикайин предметариан имтигьнар тувну.

КIваин апIуз ккундучуз, физикайиан кIули гъубху ЕГЭ ва 28-пи июндиъ бикIбан къайдайиинди харижи чIалариан гъабхру ЕГЭ дагъус-тандин выпускникари сабпи ражари тувра. Дагъустандиъ Ураза-байрам машквар къайд апIурайивал гьисабназ гъадабгъну, республикайиъ гьаму предметариан вуйи имтигьнар жара йигъари гъахбан къарар адабгънийи.

«ЕГЭ жара йигъари гъабхбан гьякьнаан Рособрнадзорихъди йикьрар гъийитIну. Диди мектебарин выпускникариз саб жюрейинра зарар тувундар. Имтигьнар къайда чIур дарапIди кIули гъахура. Гьамусяаьт улихьна йигъари туву имтигьнарин натижйир ахтармиш апIурача. ЕГЭ-йиъ 100 балл гъадабгъдарра, имтигьниан утIурккдарра а. Гьелелиг цифрйирикан улхуз ухди ву, фицики гьеле туву имтигьнарин натиж-йир йивури ими»,

– къайд гъапIнийи РД-йин образованиейинна илимдин минист-рин сарпи заместитель Ширяли Аьлиевди.

ЕГЭ тувбан асас вахт 1-пи июлиъ ккудубкIиди. 2019-пи йисандин ГИА-йин расписаниейиинди, му йигъ вари предметариан ЕГЭ тувру аьхиримжи йигъси улупна.