Дагъустандин Огни шагьриъ электрикдин цIийи линйир зигбан ва гизаф кьувват айи акв гъабхру таза шалмнар итбан ляхнар кIули гъягъюра. Думу ляхнар кIули гъахувал «ДагъэнерЖи» ООО компанияйи чаина гъадабгъну, фицики гъийин йигъаз шагьрин аьхюнуб пай абонентарин акварихъди аьлакьалу игьтияжар гьаму компанияйи гьуркIра.

 

Вахтназ вуди «ДагъэнерЖи» ООО компанияйин жавабдар директорин вазифйир тамам апIурайи Рафик Мягьямедовдин гафариинди, му ляхнар гъюру вазлин аьхирариз ккудукIиди.

«Му вахтнан арайиъ учу 5 километр манзил ади электрикдин симарин линйир зигуз, 40-тIан артухъ цIийи шалмнар итуз, гьацира цIийи трансформаторин подстанция тикмиш апIуз планламиш дапIнача. Гьаму серенжемарин дахилнаъди компанияйин пишекрари шагьрин швнуб-саб энергокомплексарин тикилишариъ расвалин ляхнарра кIули гъахиди. Гьяйифки, расвалин ляхнар кIулди вари шагьриъ гъахуз шулдарчухьан, фицики электросетарин саб пай жара компанияйин хилиъ а»,

– ктибтну Рафик Мягьямедовди.

«ДагъэнерЖи» ООО компанияйи чпин абонентариз тамам апIурайи ляхнарихъди аьлакьалу вуди аквар ктIуршвбан мумкинвалар арайиз гъюруваликан мялумат тувнайи.

«Ляхнар гьар йигъан сяаьт 9-диан хябяхъдин сяаьт 6-диз кIули гъягъиди. Ич пишекрари, хатIасузвал уьбхбан метлеб ади вахт-вахтарик шагьрин швнуб-саб кючейиъ аквар ктIуршвиди. Учу ич абонентарикан вахтназ вуйи гъулайсузваларин гъавриъ хьувал ккун апIурача», – гъапну компанияйин кIулиъ айири.