Гьаму йигъари Хив райондиъ МВД-йин УСБ-йин полковник Мюгьюдин Урдиханов кIваин уьрхбаз бахш дапIнайи спортдин серенжемар кIули гъушнийи. Дурарикан саб — 2,5 км манзилназ жаргъбахъди аьлакьалу вуйи. Спортдин му серенжемдин кIулин иштиракчйир Халкьдин Собраниейин депутат Нариман Асваров ва Мюгьюдин Урдихановдин багахьлуйир вуйи.
Райондиъ му къайдайин серенжемар кIулиъ гъягъюри, магьан миржид йис тамам шула. Спортдин серенжемарин тешкилатчйириз йислан-йисаз дурариъ иштирак шулайидарин кьадар артухъ апIуз ккунди а. Ккудушу спортдин талитариъ иштирак гъахьи 60-тIан артухъ касарира думу субут апIура. Узуз дурарикан сар вуйи, талитариъ кьюбпи йишв гъадабгъу Яхьяев Шамиликан, дугъахъди гъабхьи сюгьбатнакан, ктибтуз ккундузуз.
«Узу 2004-пи йисан Мажвгул гъулаъ бабкан гъахьунзу. Йиз фикир аннамиш апIуз хъюгъю йигълан мина, узу спортдиин гизаф юкIв алир вуза. Гъулаъ ва райондиъ му цирклиан мярака а гъапиш, дидиъ лап аьхю аьшкьниинди иштирак шулаза. Мектебдиан физкультурайин ва ОБЖ-йин дарсариан вуйи олимпиадйиризра гъахури шулзу. Гьамци, лап заанвалиинди, юкIв хъади иштирак хьувализ лигну, узуз му спортдин цирклин терефнаан 4 сабпи йишван ва 3-сана кьюбпи йишван грамотйир тувназуз. Мидланра гъайри, — 2 сабпи йишван, 1 — кьюбпи йишван ва 1 — шубубпи йишван медаларин сагьибра вуза. Му йигъари гъабхьи серенжемра йиз иштирак`вал адарди гъубшундайи. Узуз кьюбпи йишв гъабхьунзуз ва 5000 агъзур манат тувунзуз. Хъа сабпи йишв гъабхьи Яракк гъул’ан вуйи Б. Ибрагьимпашаевдиз 7000 агъзур манат, хъа шубубпи йишв гъабхьи ГъуштIил гъулан вакил Т.Гьяжибеговдиз 3000 агъзур манат тувнийи. Эгер дидиз улихьна вуйи йигъан маларихъ гъахьундайиш, узу сабпи йишв гъадабгъбиин умудлу вуйза. Якас баладар, гьар ражари улихьра даршул. Фикир апIуз хъюгъиган, гьадушваъ гучI дарди иштирак хьувал гъалибвалик гьисаб вузуз. Узу йиз таяриз ва жигьилариз мицдар серенжемариъ иштирак хьуз теклиф апIураза. Сабан дарш сабан ичв терефнаъра гъалибвал шул. Сабсана кIурза, я тяриф, ясана дамагъ апIуз кIурайиб дариз, эгер вахтниинди узухъ зегьмет зигру ва саб ликрин улихь гъягъюз узуз спонсорвалин кюмек апIру кас гъахьиш, узу республикайиан тиндира йиз ччвур мялум шлу гьунарар улупидиза. Узуз му терефнаан кюмек шул дупну, миж кивраза»,
— кIура Шамили.
Йиз ва Шамилин терефнаан спортдин му серенжемар тешкил гъапIдариз чухсагъул мялум апIурача. Хъана яркьудиси, кми-кмиди мицдар серенжемар кули гъахуз ва дурариъ иштирак хьуз ухьуз варидиз амур апIри!
