Июндин 17-пи йигъан РД-йин Халкьдин Соб-раниейин сумчIурна ургубпи сессияйиъ Алексей Владимирович Ежов Дагъус-тан Республикайин прокурорин гъуллугъниин тяйин апIбан гьякьнаан къарар кьабул гъапIну.
КIваина хурача, Алексей Ежовдин кандидатура улихьнаси Урусатдин генеральный прокурор Юрий Чайкайи улупнийи.
Республикайин парламентдин депутатарихьинди илтIикIну, Алексей Ежовди мялум гъапIганси, дугъу Дагъустандин улихьдин прокурор Денис Поповдин регьберваликкди ляхин апIурайи вахтна прокуратурайин гъуллугънаъ гизаф дигиш’валар гъахьнийи, уьлкейин главайи ва генеральный прокурори улихь диву месэлйир гьисабназ гъадагъну, идарайин кадрйирин ляхинра къайдайиз гъабхну. Алексей Ежовди учв республикайин прокуратурайин цIийи алапIнайи коллективдихъди таниш вуйиваликан, Дагъустандиъ асас фикир тувну ккуни месэлйирин гъавриъ айиваликан гъапнийи.
«Прокуратурайи республикайиъ къанунчивал тямин апIбан ляхин ачухъди, ватандаш жямяаьтлугъдин институтарихъди ва гьюкуматдин органарихъди аьлакьйир уьрхюри гъабхиди», – къайд гъапIну А.Ежовди.
