Наргиз Гюлечова

 
22-пи июли Дагъустандин Новолак райондин аьтрафариин «Росатом» корпорацияйи тикмиш гъапIу Урусатдиъ варитIан аьхю микIлахъди либхру электростанция ляхник кипну.

КIваин апIурхьа!

2022-пи йисан Санкт-Петербургдин экономический форумдиъ Дагъус-тандин кIулиъ айидари гьаму ВЭС дивбан гьякьнаан «Росатом» корпорацияйихъди йикьрар гъийитIнийи. Кьюд йисандин арайиъ проектдин документар гьязур дапIну, 2024-пи йисан 27-пи ноябри ВЭС-дин сабпи шибритI ипнийи. Гьаддихъанмина тикилиш’вала-рин ляхнар кIули гъягъюри гъахьну, ва ккудубшу йисан декабрин эвелариъ му объектдин сабпи пай ляхник кипну.
Новолакдин 300 мегаватт кьувват айи ВЭС гъийин йигъаз Урусатдиъ айи гьаму жюрейин элетростанцйирикан варитIан аьхюб ву. Му ВЭС-диин микIлахъди илтIикIру 150 метр ягълишин, 51 метрин ярхи цIабрар али ва гьарсабдиъ 320-тIан артухъ тоннайин гъагъ айи 120 алат дивна. Дурари кьялан гьисабариинди сяаьтна тартиб апIру электроэнергияйин кьадар 879 млн кВт хьибди ва 240 агъзур хулар акварихъди тямин апIиди.

 
ВЭС ачмиш апIбан серенжемдиз Дагъустандин Главайин вазифйир вахтназди тамам апIурайи Федор Щукин, «Росатом – Возобновляемая энергия» АО-йин генералный директор Григорий Назаров ва «Росатом» Госкорпорацияйин артмиш’валин ляхнарин ва халкьарин арайиъ вуйи бизнесдин директор Кирилл Комаров дуфнайи.
Чан улхбаъ Федор Щукинди гъапиганси, му гьядисайи Дагъустандин энергетика цIийи дережайиз за апIура. Региондиъ аьхю проектар уьмриз кечирмиш апIуз шлуб гьамцдар ляхнариинди тасдикь шула. Дагъустандиз айи табиаьтдин девлетар инсанар бадали ишлетмиш апIуз хъюгъра. Мушваъ йисариинди агьалйириз элетроэнергия гьубкIри адайи. Гьар ражари аквар кутIушвиган, инсанариз лап аьзият шула, биснес артмиш апIуз манигъвал тувра.
Магьа гъи ухьу абццрайи Новолакдин микIлахъди либхру электростанция, республикайин электроэнергияйин хатIалувал уьбхбаъ алдабгъурайи яркьу гам ву. Му объект ачмиш апIбиинди инсанар, ужуб ерийин электроэнергияйихъдиси, ляхин апIру йишварихъдира тямин апIиди. Гьаддихъди сабси бюждетдиз гъюру налогарин кьадарра артухъ хьибди.
«Росатом» госкорпорацияйихъди сатIиди апIурайи ляхин мянфяаьтлуб вуди рябкъюрахьуз.

Гьаму йисан республикайиъ «чру» энергетика тартиб апIурайи швнуб-саб объектар ляхник кирчна. СатIиди апIурайи ляхин хъанара давам хьибди. Фицики республикайиъ му циркил цIийи алапIуб ва гьаддихъди сабси инвесторарра жалб апIуб лап чарасуз ву», – гъапну Федор Щукинди.

 
Новолакдин микIлахъди лихбру электростанция ачмиш апIбан серенжемдиъ иштирак шулайи Григорий Назаровра удучIвну гъулхнийи.

 
«Магьа ухьу гъи 10-пи ВЭС ачмиш апIурахьа. Ухьуз думу гьаци аьдатиди ачмиш апIурайи нубатнан станция дархьуз, думу сарун «Росатом»Урусатдин картайиин али цIийи регионси, ихь уьлкейиъ учу дивнайи варитIан аьхю ВЭС-ра ву», - гъапну Григорий Назаровди.

Чан улхуб аьхирихъна хури дугъу республикайин улихь-кIулихь хьайидаризра сатIиди му проект уьмриз кечирмиш апIбаз чухсагъул мялум гъапIну. Дугъан гафариинди, алахьури гъахьи читин месэлйир сатIиди, командайин ляхниинди гьял апIуб тикилишар гъахбаъ нумуна вуди гьисаб апIуз шулу.