Урусатдин гизаф шагьрар гъулариъси, июнь вазлин 21-пи йигъан Дербент шагьрин майдандиинра цци мектеб ккудубкIу шагьрин, вари мектебарин баяр-шубарин сатIиди вуйи серенжем кIули гъубшну. Му серенжемдиз мектеб ккудубкIу баяр-шубарси, дурарин абйир-бабар, багахьлуйир, мялимар, шагьрин агьалйир уч духьнайи.
Шадвалин мяракайиъ гьацира шагьрин глава Хизри Абакаровди, шагьрин депутатарин Собраниейин председатель Мавсум Рягьимовди, главайин заместителар вуйи Видади Зейналовди, Рустамбег Пирмягьямедовди, Шамиль Аьлиевди, ГУO-йин начальник Гюльназ Самедовайи ва шагьрин жюрбежюр тешкилатарин пишекрари иштирак’вал гъапIну.
Серенжем абццри, Хизри Мягьямедовичди мектеб ккудубкIу баяр-шубар, дурарин абйир-бабар, 11 йисандин арайиъ баяр-шубариз аьгъювалар туври, зегьмет гъизигу мялимар му йигъахъди тебрик гъапIнийи. Чан терефнаан Гюльназ Гьюсейновайира, баяр-шубар мектеб ккудубкIбахъди тебрик апIури, дурариз гележегдиъ хъуркьувалар ва чпин юкIв хъайи урхбан тешкилатариъ урхувал давам апIуз мумкинвалар хьуб ккун гъапIну.
«БицIивахтнан аэропорт «Нарын-гъала» кIуру му мярака кIули гъабхурайидарира, самолётдин стюарддин ва стюардессайин палат алди, серенжем ккебгъну ккудубкIайиз аэрофлотдин темайиинди кIули гъубхну. Мектеб ккудубкIу выпускникари чпин терефнаан абйир-бабариз, мялимариз гьязур дапIнайи гафар гъапну ва пешкеш вуди мяълийирна ялхъвнар гъапIну.
Ццийин йисан Дербент шагьриъ 528 балина шуру мектеб ккудубкIну, дурарикан 77 касди – гъизилин медалариз. Заан аьгъювалар гъадагъу баяр шубарси, имбударра тебрик апIури, шагьрин глава Хизри Мягьямедовичди гьамци гъапну:
«Гьюрматлу 2019-пи рейснан пассажирар! Йиз фикриинди, учву, ужудар аьгъюваларин гъагъра хьади, аьхю уьмриъ лик иврачва. Самолётдиъ регистрация апIбан кьяляхъ, гьарури чан йишв бисури аьдат ву. Учву ЕГЭ-йин экзаменар тувну, регистрация гъапIунчва. Уьмрин кьисматну учву жюрбежюр йишварихьинди гьаъди. Узу учвуз кIваантIан бахтлу тIирхувал ва ужуди дурсувал ккун апIурза. Ичв абйир-бабари, багахьлуйири, мялимари, учвуз таниш вуйидари учв`инди дамагъ апIруганси яшамиш йихьай, ва ужудар аьгъювалариинди ичв юкIв хъайи заан ва кьялан пишекарвалин тешкилатар ккудукIну, багъри шагьриз хъадакну гъачай».
Чпин терефнаан Гюльназ Гьюсейновайира, Видади Вагифовичдира, Рустамбег Седрединовичдира ва гьацира абйир-бабарира выпускникар тебрик гъапIну ва дурариз жандин сагъ’вал, гележегдиъ хъуркьувалар ккун гъапIну.
Дупну ккундуки, му шадвалин мярака шагьрин ГУО-йин пишекрарихъди сатIиди 17-пи нумрайин мектебдин ва ДДЮТ-дин коллективари тешкил гъапIнийи.
Гизаф инсанар иштирак гъахьи му мярака варидариз рябкъри кIури, Хизри Мягьямедовичдин кюмекниинди серенжем аьхиримжи вахтна ишлетмиш апIурайи трансляцияйин къайдайиинди кIули гъубшну.
Гьацира му йигъан шагьрин серенжемдиъ РД-йин мяълийирин адлу устадар, ялхъвнарин ансамблйир иштирак гъахьну. Кюкйири, жюрбежюр рангарин шарикари, учвудар мяълийири ва ялхъвнари уч духьнайидарин юкIвар шад гъапIнийи, ва заан дережайиинди кIули гъубшу шадвалин мярака мектеб ккудубкIу баяр-шубаризси, дурарин багахьлуйириз, мялимариз кьаназ кIваинди гъубзди.
