Ккудубшу аьсрин 90-пи йисари «Литературайин Табасаран» ччвур али, табасаран чIалниинди чапдиан удубчIвурайи журнал жюрбежюр себебариан хъябкьнийи. Гъи дидиз цIийи уьмур тувна. Фицики гъябгъюрайи йисан журнал тазади чапдиан удубчIвуз хъюбгъди. Дидин сабпи нумра чап апIуз гьязур дапIна.
Журналин кIулин редактор ихь ватанагьли Табасаран райондин Халагъ гъул’ан вуйи, филологияйин илмарин кандидат, РД-йин жямяаьтлугъ палатайин вакил Сефижат Кьасумова ву. ЦIиб улихьнаси Сефижат Мягьямедкеримовна «Табасарандин нурар» газатдин редакцияйиз хялижвди гъафну ва цIийи журналикан ктибтну.
«Ихь халкьдин гизаф вакилариз мялум вуйиганси, «Литературайин Табасаран» журнал 90-пи йисаризкьан чапдиан удубчIвури гъабхьну. Думу йисари ихь уьлкейиъ арайиз гъафи дигиш’валар себеб духьну, журнал хъябкьну. Дидхъан мина 30 йистIан артухъ вахтна журнал чапдиан удубчIвури гъабхьундар. Журнал цIийикIултIан арайиз хуз ккунди, ихь хайлин ватанагьлийири, жямяаьтлугъ касари, улихь-кIулихь хьайи вакилари хайлин зегьмет гъизигну ва, аьхирки, думу ляхни ужуб натижара тувну»,
– къайд гъапIну Сефижат Мягьямедкеримовнайи. Дугъан гафариинди, журнал кьюб вазлик саб ражари чапдиан удубчIвиди. Журналиъ 96 маш а. Дидиъ поэзияйин, прозайин, драматургияйин, литературайин критикайин, тарихдин ва чIалнан рубрикйир хьиди. Му паяриз дилигди, журнализ мумкинвалар гизаф а. Душваъ жара рубрикйир тIауз, чIалнан улихь дийигънайи месэлйирикан улхуз, бицIидариз вуйи литература чап апIуз, сатира ва юмор бикIуз хай шулу. Дидиз жямяаьтлугъдинна политикайин статус тувна.
Журнализ чан хусуси редколлегияйин десте тяйин гъапIну. Думу дестейин вазифа гьадму вуки, журнал гьязур апIуз хъюгъяйиз, редколлегияйи журнализ тувру яратмишарин месэла гьял дапIну ккунду. Редколлегияйин дахилнаъ шаирар, аьлимар, журналистар, жямяаьтлугъ касар а. «Литературайин Табасаран» журналин сабпи нумра июль вазлин эвелариъ чапдиан удубчIвиди. Пишекар шаирарихьанси, машгьур писателарихьанси, литературайин майдандиъ сабпи гамар алдагъурайи жигьиларихьанра журнализ чпин яратмишар хътауз шулу. «Литературайин Табасаран» журнал, икибаштIан, табасаран чIалниинди чапдиан удубчIвура.
Газатарин вая журналарин редакцйирин вакиларин метлеб – ихь чIал, халкьдин культура, литература ва жара цирклар улихь гъягъювал, артмиш апIувал ву. Сефижат Кьасумовайиз цIийи гъуллугъ тебрик апIури, дугъан алдабгъурайи гьарсаб гам ягъурлуб хьувал, журнализ гизаф кьадар ихь ватанагьлийири подписка апIувал, журналин гьарсаб нумра чапдиан удубчIвайиз, вари маракьлувалиинди дидиз ккилигруб хьувал ккун апIурхьа.
