Улихьнаси Черногория гьюкуматдиъ духтрарикан уч дапIнайи футболин командйирин арайиъ футбол уйнамиш апIбаан олимпиада кIули гъубшну. Цци му талитариъ сабпи ражари вуди Урусатдиан вуйи духтрарикан уч дапIнайи командара иштирак гъабхьну. Думу командайин дахилнаъди спортдин му серенжемдиъ Санкт-Петербургдиъ духтрарди лихурайи 4 дагъустанлуйирра иштирак гъахьну. Дурарикан сар – ихь ватанагьли, Хючна гъул’ан вуйи, гьамусяаьт Санкт-Петербург шагьриъ Елизаветинский больницайиъ нейрохирургди лихурайи Руслан Аьбдурягьманович Аьлиев ву.
Русланди мялум гъапIганси, дугъан гьеле бицIиди имиди, чакан футболист духьну, Урусатдин уч дапIнайи футболин командайихъди футболин талитариъ иштирак хьуз хиял вуйи. Амма кьисмат жараси гъабхьну – дугъу духтирвалин кесп ктабгъну. Гьаци вушра, дугъан бицIидигандин хиял гъи кIулиз удубчIвну.
«Узу духтирвалин кесп ктабгънушра, футболихьан ярхла гъахьундарза. Азад вахт ккабхъубси тренировкйириз гъягъюри, яна бицIидигандин кIван мурад-метлеб кIулиз адабгъуз кIури, гизаф зегьмет зигури гъахьунза. Аллагьдин кюмекниинди ва узу йиз улихь дивнайи кьастниинди Урусатдин духтрарикан уч дапIнайи футболин командайиз гъадагъунзу», – кIура Руслан Аьлиевди.
Ав, духтирвална футболиствалин пише чиб-чпихьан гизаф фаркь’вал айидар ву. Амма Русландиз дурар сатIи апIуз зат гъагъиди дар. Дугъу кьюбби цирклариъра ужудар хъуркьувалар улупура.
Олимпиадайикан фу пуз шулвухьан кIури, узу гьерхиган, дугъу гьамциб жаваб тувнийи: «Футболиан вуйи олимпиада гизаф ужуб гъабхьну. Му йигъар йиз затра кIваълан дурушур. Хайлин таниш’валарра гъахьнийиз. Урусатдин духтрарикан уч дапIнайи футболин командайиъди иштирак шули, йиз цци сабпи йис вуйиз. Му серенжемдизси, жара гьюкуматдиз душну, душваъ турнириъ иштирак хьувалра йиз уьмриъ сабпи ражари гъабхьи гьядиса ву.
Ич команда му олимпиадайиъ 6 ражари харижи уьлкйирин командйирихъди талитназ удубчIвну. Колумбия, Бразилия, Чили, Узбекистан, Польша гьюкуматариан вуйи командйириин гъалиб гъахьунча. Финалиъ Норвегияйиан вуйи командайихъди талитназ удучIвну, дурариин гъалибвал гъадабгъбиинди ич команда олимпиадайин чемпион гъабхьну», – гъапнийи жигьил духтри.
Сюгьбатнан аьхириъ Русланди чахъанди юкIв убгурайи, чан гъалибвализ ккилигурайи касариз варидиз чухсагъул мялум гъапIну, хъа чан гъалибвалин олимпиадайин гъизилин медаль асас вуди абйир-бабариз, багахьлуйириз ва дустариз бахш апIурайиваликан гъапну.
Гьелелиг Русландин яш 26 йистIан дар. Гъит, чан гъюзимбу уьмриъ дугъаз духтирвалин цирклиъра ва спортдин терефнаанра хъанара гизаф хъуркьувалар ишри. Июлин аьхириъ Руслан Дагъустандиз гъюру. Учу дугъаз редакцияйиъ ккилигурача.
