Гъубшу султ йигъан Калининград шагьрин «Кагьрабайин» спорткомплексдиъ швнуд-сад агъзур тамашичи ММА-йин кчIихбариан талитариз лигуз уч гъахьну. Му турнириз тамаши хъапIрудариз гьязур гъапIу билетар хайлин йигъар улихьна бицIи вахтнан арайиъ масу тувну ккудукIнийи.

 

Мукьан аьхю кьадар агьалйир талитариин маракьлу духьнайивализ чан себебар айи. Думу Калининград шагьриъ Урусатдиъ сабпи ражари вуди ММА-йин кчIихбарин жюрйириан талитар тешкил апIбан дахилнаъди «Кагьрабайин чIул» бадали вуйи вари халкьарин турнир гъабхурайивалихъди аьлакьалу вуйи.

Кагьрабайин багьалу чIул гъазанмиш апIуз Сирияйин, Ирандин, Афгъанистандин, Белоруссияйин, Киргизияйин, Урусатдин 24 машгьур спортсмен гъафнийи. Мицдар чIулар кьюб вуйи. Дурар 70 ва 90 кило гъагъ айи спортсменарин арайиъ ужудар, маракьлу кчIихбар улупу ва заан натижйир гъадагъу баярин арайиъ гъахьи талитариъ гъалибчйириз тувнийи.

Турнириъ кьюр табасаран байра айи: ихь машгьур спортсмен Багьаудин Абасов («Спартанец») ва Артур Аьлиев.

Багьаудинди сабпи кчIихуб Тверь шагьриан вуйи машгьур спортсмен Дмитрий Гавриловдихъди кIули гъубхну. ИкибаштIан, ихь бай му талитнаъ гъалиб гъахьну.

Кьюбпи раунддин кьяляхъ Дмитрий Гавриловди чахьан кчIихуз, яна талит давам апIуз, даршлуваликан хабар тувну.

Кагьрабин чIул бадали вуйи кьюбпи туриз Багьаудин Киргизияйин спортсмен Данияр Колбаевдихъди удучIвнийи. КчIихуб гъагъиб гъабхьну. Дагъустандин спортсменди Данияриз аьксиди швнуб-сабан ижми ва заан пишекарвалин приемар ишлетмиш гъапIнийи. Амма киргиз спортсмендиз гьар ражари думу приемаригъян гъюдучIвуз, йивбариккан ккутIурчIвуз мумкинвал бихъурайи. Багьаудин талитарихьна лап ужуди гьязур духьнайи. Гьаддиз натижайиъ дугъу, талитнаъ лайикьлу гъалибвал гъадабгъну, багьалу чIул Дагъустандиз гъабхну.

Учу Багьаудин Абасов ва Артур Аьлиев гъалибвалар гъадагъбахъди тебрик апIурача.

Ихь спортсменари чпи гъазанмиш гъапIу хъуркьуваларикан ва кIули гъуху кчIихбарикан багарихьди учу дурарихъди тешкил апIру сюгьбатнаъ ктибтиди.