Районар, гъулар мюгькамди артмиш апIуз шартIар яратмиш апIувал ихь гьюкуматдин политикайин асас пай дубхьну ккунду. Фицики, инсанар ипIру-убхъру сурсатарихъди тямин апIбаъ гъуларин аьтрафари ва гъулариъ яшамиш шулайи агьалйири важиблу йишв дибисна.
Дагъустандиъ 2019-пи йисан «Деврин тIалабариз жаваб тувру шагьрин юруш яратмиш апIбан» программайин дахилнаъди жямя-аьтлугъ 207 аьтраф ва хуларихъ хъайи 14 гьяят къайдайиз духну ккунду. Думу метлебариз 1,1 миллиард манат улупна. Дидин гьякьнаан июлин 2-пи йигъан РД-йин тикилишчивалин ва ЖКХ-йин министр Малик Баглиевди къайд гъапIну.
Улихьна йигъари Хив райондин администрацияйиъ «Деврин тIалабариз жаваб тувру шагьрин юруш яратмиш апIувал» муниципалин программа уьмриз кечирмиш апIбан месэлайиз бахш дапIнайи заседание кIули гъубшнийи. Учуз муниципалитетдин мялуматарин гъуллугънаан хабар тувганси, заседаниейиъ асас доклад хьади райондин ЖКХ-йин, тикилишчивалин ва архитектурайин отделин начальник Оскар Аьгьмедов удучIвну гъулхнийи. Дугъу къайд гъапIганси, 2022-пи йисаз гъулай шартIар яратмиш апIбан программайиз асас вуди, райондиъ жямяаьтлугъ 22 аьтраф ва гизаф квартирйир ккайи 5 дараматдин гьяятар къайдайиз духну ккунду. Программа уьмриз кечирмиш апIбаъ варитIан читинди алабхъурайиб ихтияр тувру документар гьязур апIувал ву.
О.Аьгьмедовдин гафариинди, Хив, ЗахитI ва ЦIийи Фригъ гъулариъ къайдайиз духну ккуни аьтрафарин документар гьязурди адайи. Хив гъулаъ бицIидарин майдан тикмиш апIру йишв сар касдин хусусиятнаъ ади гъабхьну. Хъа тмуну гъулариъ къайдайиз духну ккуни аьтрафар гъулан мяишатдин мяна айи жилар ву.
Хив райондин глава Ярмет Ярметовди, муниципалин программа уьмриз кечирмиш апIбахъан жавабдарвал гъабхурайи касарин ляхниъ айи камивалар къайд дапIну, гъуларин главйирикан 1000-тIан артухъ инсанар яшамиш шулайи гъулариъ жямяаьтлугъдихъди собранйир гъахувал ккун гъапIну. Думу ляхин, гъуларин поселенйирин жямяаьтлугъ аьтрафар прог-раммайин дахилназ гъадагъбан гьякьнаан йикьрар апIбан бадали, чарасуз лазим ву. Я.Ярметовди гъуларин поселенйирин главйириз, жямяаьтлугъ аьтрафар ккабалгбан бадали, думу жилар муниципалин хусусиятназ гъадагъбан ляхин гъабхувал табшурмиш гъапIну.
