Цци, Табасаран район арайиз дуфну, 90 йис шула. Райондин администрацияйи, тешкиллувалин комитетди, гъулан поселенйирин кIулиъ айидари му важиблу гьядисайихьна вуйи гьязурлугъвалар кIули гъахура.
Июлин 4-пи йигъан Мягьячгъала шагьриъ фирма «АС» тешкилатдин конференц-залиъ Табасаран райондин юбилейиз китаб гьязур апIбан месэлйириз бахш дапIнайи заседаниейиз тешкиллувалин комитет уч гъабхьнийи. Серенжемдиъ тешкиллувалин комитетдин председатель, Табасаран райондин глава Мягьямед Къурбанов, дугъан заместитель Аьбдулвагьаб Аьбдулов, Дагъустандин Халкьдин Собраниейин депутатар Алавудин Мирзабалаев ва Сефер Алиев, РД-йин Главайин багахь хьайи яшлу касарин Советдин член Мягьямед Юнусов, аьлимар Мягьямед Гьясанов ва Мягьямед Къурбанов, Табасаран драмтеатрин директор Аьлимурад Аьлимурадов, Табасаран халкьдин яшлу-йирин Советдин председатель Исамудин Рамазанов, Р.Гьямзатовдин ччврнахъ хъайи вари халкьарин фонднан вице-президент Гьябибат Аьзизова, Дагъустандин писателарин Союздин табасаран секцияйин руководитель Сувайнат Кюребегова, «Табасарандин нурар» газатдин кIулин редактор Гюлягьмад Маллялиев, РД-йин Жямяаьтлугъ палатайин комиссияйин председатель Юнус Муртузялиев, РГВК-йин журналист Мягьямед Гьюсейнов, дилаварчи кас Эйваз Рамазанов, журналист Умгьанат Сулейманова иштирак гъахьну.
Серенжем ачмиш апIури, Мягьямед Къурбановди юбилейин йигъ тяйин дапIнайиваликан хабар тувнийи. Шадлугънан серенжемар Табасаран райондиъ сентябрин 28-пи йигъан къайд апIиди.
«Ихь райондиз Урусатдиан ва республикайиан 300-дихьна хялар гъиди. Гьюрматлу дустар, ухькан гьарсари дурар, жвуван гирами хяларси, ихь халкьдиз хас вуйи аьхю гьюрматниинди, маш разиди кьабул дапIну ккунду», – гъапнийи райондин главайи.
Хъасин китабдиз материал гьязур апIувал фициб гьялнаъ аш, китабдин гъурулуш, кIалиб фициб шулуш, Юнус Муртузялиевди ктибтнийи. Уч духьнайидари гьарури гьял апIурайи месэлайин гьякьнаан чпин теклифар ва фикрар гъапнийи. Натижайиъ тешкиллувалин комитетдин председатели уч духьнайидарикан – гьарури чан цирклиан – июлин 10-пи йигъаз Табасаран район ва халкь бадали марцци зегьмет гъизигу, дурар чпин хъуркьувалариинди адлу гъапIу вакиларикан китабдиз мялуматар гьязур апIуб табшурмиш гъапIнийи.
Серенжемдиъ юбилейихьна жара терефарианра гьязурлугар фици кIули гъягъюраш, гьял гъапIнийи.
