Аьхиримжи вахтна Табасаран райондиъ хайлин дараматар, рякъяр, паркар, мектебар цIийи алаъбан ляхнар кIули гъягъюра, хайлин тикилишар бинайиан рас апIуз планламиш дапIна. Гьяйифки, вари ляхнар вахтниинди ва деврин тIалабариз жаваб тувру къайдайиинди гъахуз пулин дакьатар гьуркIрадар. Узу Хюрикк ва Туруф гъуларин гъагъи гьялназ дуфнайи мектебарикан улхураза.

 

Июлин 24-пи йигъан Табасаран райондин администрацияйиъ гъубшу совещаниейиъ думу гъуларин мектебарин гьякьнаан вуйи месэлара гъитIибккнийи.
Райондин глава Мягьямед Къурбановди чан улхбаъ къайд гъапIганси, аьхиримжи вахтна Хюрикк ва Туруф гъулариъ цIийи мектебар ва Сиртич гъулаъ бицIидарин багъ тикмиш апIбан йикьрар йитIура. «150 мектеб» проектдиъ иштирак шулайи 12 мектебдиъ расвалин ляхнар гъягъюра. Гьамусяаьт райондиз инвестицйир жалб апIбан ляхнарра мянфяаьтлуди гъахура.

Мягьямед Къурбановдин гафариинди, гъябгъюрайи йисан райондиъ саки 40-рихьна идарйир бинайиан рас апIиди.

Главайи, саб йишв’инди хайлин дараматар къайдайиз хували ва гъягъюрайи тикилишчивалин ляхнари аьхю жавабдарвал ккун апIурайивалра къайд гъапIну.

«Гьарсаб тикилишдихъан жавабдарвал гъабхру касари, ляхин фици кIули гъябгъюраш, йигъ гъидидипди, гюзчивал уьбхюри, ахтармишар гъахури ккунду. Сар фуж-вуш тахсиркар духьну, ляхин дебккбан дюшюшар даришри», – гъапнийи Мягьямед Къурбановди.

Главайи къайд гъапIганси, саб дарш жара ихтиярар тасдикь апIру кагъзар къайдайиъ вая гьуркIри адрувал себеб вуди, райондихьан швнуб-саб ражари республикайин ва федералин программйириъ иштирак хьуз гъабхьундар. М. Къурбановди му месэлайиз вахтниинди лигуб ва вари кагъзар къайдайиъди гъитуб ккун гъапIну.