Июлин 24-пи йигъан РД-йин Главайи 2019-пи йисан Расул Гьямзатовдин ччвурнахъан вуйи премия тувбан гьякьнаан къарарикк къул гъизигну.

 

Думу премияйин сагьибар «Вягьшйирин алжагъувал: макьалйир, очеркар, фикрар» китаб гъибикIу Мурад Мягьямедович Аьгьмедов ва табасаран чIалниинди чапдиан удубчIвнайи «ЧIалнан ядигар» китабдин автор, ихь машгьур шаир Гюлбике Агъамягьямедовна Уьмарова гъахьну. Республикайин Гьюкуматдин терефнаан му премияйин гьарсар сагьибдиз 150 агъзур манат тувди.

Гюлбике Уьмаровайи ич сюгьбатнаъ къайд гъапIганси, «ЧIалнан ядигар» китаб Хив райондин администрация-йин терефнаан премияйиз улупну. «Думу китаб 2-3 йис мидиз улихьна чапдиан удубчIвну ва дидин презентацияра гъапIнийхьа. Китаб урхрударин, мялимарин мелзниин алди гъабхьну. Гьаддиз ихь халкьдин улихь-кIулихь хьайидар, премияйиз улупру китаб гъядябгъруган, «ЧIалнан ядигар» китабдиин дийигъну», – гъапну шаири.

Г.Уьмаровайи аьхиримжи йисан Р.Гьямзатовдин «Йиз Дагъустан», А.Пушкиндин «Евгений Онегин» ва жара машгьур эсерар ихь чIалназ таржума дапIна. Гьамусяаьт думу бицIидариз вуйи шиърарин китабдиин лихура.

«Табасарандин нурар» газатдин редакцияйин коллективди багъри халкьдинси, ватандин литературайик баркаллу пай киврайи Гюлбике Агъамягьямедовна му заан премия гъадабгъбахъди тебрик апIури, гележегдиъ дугъаз хъана хъуркьувалар, жандин сагъвал, хушбахтлувал ккун апIура.