Августдин 13-пи йигъан 10-пи ражари кIули гъябгъюрайи вари халкьарин «Машук» форумдиъ, Михаил Юрьевич Лермонтовдин 205-йисаз бахш дапIнайи «Думу вари ву – Урусатра, Кавказра» кIуру литературайин конкурсдиъ ихь ватанагьли, Табасаран драмтеатрин жигьил актер Аким Сяидялиев иштирак гъахьну.

 

Полуфиналиан финализ удучIву 10 касдин арайиан Аким Сяидялиевдиз вая Чечен республикайиан вуйи Мадина Гьясановайиз, фунуриз сабпи йишв тувруш, жюрийихьан саб мясляаьтнахъна гъюз гъабхьундар. Гьаддиз дурар кьюбридра сабпи йишван сагьибар гъахьну.

Къайд апIуб лазим вуки, конкурсдин полуфинализ удучIву иштиракчйир дипломарихъди лишанлу гъапIну. Хъа Акимдизна Мадинайиз конкурсдин асас пешкеш вуйи, «Ломоносовдин аьрабйирин сюри. Пекдин рякъ» проектдин насигьятчивалин сертфикатар тувну. Учв Аким Сяидялиевди мялум гъапIганси, конкурсдиъ дугъу М.Лермонтовдин «Гъилицнац» шиир урус чIалниинди ва табасаран чIалниинди гъурхну (таржума гъапIур Э.Аьшурбегова).

Аким Сяидялиев, «Машук» форумдин улхьан йисарин гъалибчйирикан ибарат дубхьнайи вари халкьарин Ломоносовский клубдиз кьабул гъапIну. Дидин вакилари, гьар йисан Урусатдин жюрбежюр шагьрариз гъягъюри, поэзияйин серенжемар тешкил апIури шулу. Гъюру йисан Акимди «Машук» форумдиъ табасаран чIалниинди сар актерин бицIи спектакль улупуз кка.