Гъябгъюрайи йисан Дагъустандиъ, аграрный циркил артмиш апIури, 900 га тIумтIин таза багълар кивуз планламиш дапIна.
Му улупбар цIиб улихьнаси РД-йин гъулан мяишатдин ва итIру сурсатарин Министерствойиъ кIули гъубшу совешаниейиъ РД-йин гъулан мяишатдин ва итIру сурсатарин министр Абзагир Гьюсейновди арайиз адагънийи.
Дугъан гафариинди, республикайиъ му циркил артмиш апIуз 2019-пи йисан 500 миллионтIан артухъ манат жара дапIна, думу дакьатар 70 мяишатдихьна дурукьна.
«Гъябгъюрайи йисан республикайин 12 муниципалин районариъ 554,3 га жилиин тазади тIумтIин багълар кивну. Йисандин аьхириз 900 га жилиин тIумтIин багълар кивувал улупна. Гъийин йигъаз республикайин мулкариин тIумтIин багълари 25,8 агъзур га жил дибисна», – къайд гъапIну министри.
ТIумтIар уч апIбаан Дагъустан Республика СКФО-йиъ сабпи йишв’ин ал, хъа кIулди Урусатдин Федерацияйиъ – кьюбпи. Сабпи йишв Краснодарский крайди дибисна. Урусатдин аьтрафариин али тIумтIин багъларикан 30,6% Дагъустандиндар ву.
