Гьюрматлу дустар!
«Табасарандин нурар» республикайин газат гъи ихь халкьдин вакилар, машгьур спортсменар, гьюрматлу хялар, Урусатдин ва харижи уьлкйирин жюрбежюр шагьрариъ яшамиш шулайи ихь ватанагьлийир, аьлимар, шаирар ва писателар, лайикьлу духтрар, депутатар ва аьдати касар кьабул апIурайи ачухъ майдандиз илтIибкIна. Учу, газатдин журналистар, редакцияйиз гъафи вая жюрбежюр месэлйирин гьякьнаан телефондиз зенг гъапIу касдихъ хъпехъуз, дугъан дерди гьял апIбан рякъяриъ кюмекчйир хьуз, багъри ватандашарин баркаллу ляхнарикан, хъуркьуваларикан бикIуз гьязур вуча.

 

Табасаран халкьдин гизаф вакилар Урусатдин шагьрариъ яшамиш шула. Аьдат вуйиганси, хьадан вазари дурар багъри ватандиз гъюри шулу. Хайлиндариз, дурар республикайиз дуфнайиваликан хабар гъабхьибси, учухьна гъюз теклиф апIурача. Ич теклиф аьхю аьшкьниинди кьабул апIурайивалиин шадра шулача. Учуз учвухьна илтIикIуз ва ихь газатдин редакцияйихьан гъирагъдиъ гъудрузбан теклиф апIуз ккундучуз.

«Табасарандин нурар» гьарсар табасаран вакилин пай кайи мурччв дубхьну ккунду. Думу ичв багъри гъулан тарих, бабан чIал, халкьдин ирс, ата-бабйирин аьдатар, кюгьне культурйир уьрхюрайи ва артмиш апIурайи багьалу савкьат ву. Учуз, ихь халкьдин тарихдиъ гъубзбан бадали учвкан, учву гъабхурайи баркаллу ляхникан, хъуркьуваларикан, дишагьлийирин намуснакан багъри халкь ва ватан адлу апIбак учву киврайи намуслу пайнакан бикIуз ккундучуз. Хайлиндариз теклиф дарапIди редакцияйиз гъюз начди шулу. Учуз ихь ватандашар Урусатдиан дуфнайиваликан гьеле-меле хабар ади шулдарчуз. Теклифназ миккилиганай! Гъачай! Учу учвуз хяларди гъюз теклиф апIурача!