Августдин 25-диъ Табасаран райондин Сиртич гъулаъ бицIидарин майдан ачмиш апIбахъди аьлакьалу вуйи шадлугъар кIули гъушну. БицIидариз майдан «Шагьрин вари шартIар айи йишв» программайиз асас вуди тикмиш дапIнайиб ву.
Шадлугъариъ «Табасаран район» МР-ин глава Мягьямед Къурбанов, РД-йин юстицияйин министр Къазимягьямед Сефикъурбанов, РД-йин НС-дин депутат Алавудин Мирзабалаев, РД-йин ЖКХ-йин ва тикилишчивалин министрин заместитель Ризван Мурадов, къайд гъапIу программа уьмриъ гьяятназ кечирмиш апIбиин жямяаьтлугъ гюзчивал гъабхурайи, «Йиз Дагъустан» конкурсдин гъалибчи Рукьият Аьгьмедова, пауэрлифтингдиан Дюн`яйин ва Европайин чемпион, Варидюн`яйин классдин спортдин мастер, гьадму жюре спортдин федерацияйин президент, РФ-дин Госдумайин депутат Ризван Къурбановдин кюмекчи Рустам Бегерин ва Сиртич гъулан жямяаьт иштирак гъахьну.
Сиртчар шадлугънан думу гьядисайихъди тебрик апIури, Мягьямед Къурбановди гъапну: «Му майдан Дагъустан Республикайин руководствойин терефнаан Сиртич гъулан агьалйириз аьхю пешкеш ву. Мидланра савайи, Сиртич гъулаъ вари шартIар айи бицIидарин багъдин тикилиш дивуз гьязурлугъ’валар кIули гъахура. Думу 2026-пи йисан ишлетмиш`вализ тувуз ниятар а. 2020-пи йисан, «Ерли жямяаьтлугъдин тереф уьбхюб» программайиз асас вуди, ичв гъулаъ спортдин майдан ачмиш апIувалра планламиш апIурача. Райондиъ уьмрин активвалин тереф уьбхюрайи, ихь агьалйирин уьмрин дережа за апIбаъ иштирак шулайи ватанагьлийириз чухсагъул кIураза…»
Мягьямед Къурбановди бицIидарин майдан албагбан ляхнариъ тафавутлу гъахьидариз гьюрматнан грамотйир, хилихъ хъаъру сяътар тувну, гьадму гьисабнаан Дагъустандин Огни шагьриан вуйи «Югводпроектстрой» ООО-йин генеральный директор Амираслан Султановдиз, жямяаьтлугъ гюзчи Идаят Ибрагьимовдиз, меценат Анзор Къазимягьямедовдиз ва жарадариз. Шадлугънан серенжемдиз дуфнайидариз райондин культурайин Хулан гъуллугъчйири концертдин яркьу программа улупну.
