Дагъустандин Глава Владимир Васильев, терроризмдихъди женг гъабх-баъ сабвал улупру Йигъахъди аьлакьалу вуди, республикайин агьалйирихьна илтIикIну.
«Гъи – 3-пи сентябриъ – Урусатдиъ гьюрматнан йигъ къайд апIура – Терроризмдихъди женг гъабхбаъ сабвал улупру Йигъ. 15 йис улихьна Беслан шагьриъ гъахьи бедбахтвалин гьядис-йири вари дюн’я гукIни гъапIнийи, Урусатдин гьарсар ватандашдин кIваъ атIабгну, террорин инсафсузвалин мяна улупнийи.
Му йигъан ухьу кIваъ аьхю дерд ади Къизлариъ, Буйнакскдиъ, Каспийскдиъ ва жара шагьрариъ кIули гъуху терактариъ гъийихдар кIваин апIурахьа, терроризмдихъди вуйи женгнаъ йивну гъийиху къанун уьбхру органарин гъуллугъчйир, дявдин эскрарин, тахсиркарвалин идеологияйиз ачухъди аьксиди удучIву диндин, жямяаьтлугъдин ва гьюкуматдин вакиларин улихь кIулар ис апIурахьа. Дурарин арайиъ муфтий Сяидмугьяммад-гьяжи Абубакаров ва Чиркейин шейх Сяид-афанди, министрар Мягьямедсалигь Гусаев, Аьдильгерей МягьямедтIагьиров, Загьир Арухов, Гьарун Къурбанов, «Дагъустан» ГТРК-йин председатель Гьяжи Абашилов а. Сабвал улупбан йигъу терроризмдиз аькси гьяракатар гъахбаъ гьюкуматдинна жямяаьтлугъдин сатIивал лишанлу апIура. Урусатдин жара регионариъси дарди, Дагъустандиъ му писвалихъди вуйи женг халкьдинра, гьюкминра сатIи кьувватар тIалаб апIру месэла вуйиваликан лап ужуди аьгъя.
1999-пи йисан ихь республикайиъ вари халкьарин яракьламиш духьнайи гъачгъарин дестйир архьиган, аьдати дагъустанлуйири, чпин хуш’валиинди халкьдикан уч гъапIу кьушмин жергйириъ учIвну, федералин кьувватарихъди сатIиди ихь Ватан гъюбхнийи, гьадмуган ихь уьлке улихьдин гьялназ хувал ккебгънийи.
Гъи Урусатдин Федерацияйин Президент В.В.Путиндин регьберваликкди кьувватнан гъурулушари, гьюкуматдин органари ва жямяаьтлугъдин кьувватари терроризмдиз аьксивал улупбан файдалу гъурулуш тикмиш дапIна, рюгьнанна эдеблувалин аьдати девлетар мюгькам апIура. ХатIасузвал уьбхюз къурхулувал айи далилар цIиб апIували ухьуз яшайишдинна экономикайин артмиш’валин цIийи дережайиз удучIвуз, ихь уртахъ вуйи хал – Урусат хъана уткан апIбан бадали, сатIиди зегьмет зигуз ва яратмиш апIуз мумкинвал тувну. Ухьу инсанарин хатIасузвал бадали чпин уьмрар тувдар кIваин уьрхюри гъитдихьа, дурари улупу игитвалариинди аргъаж шулайи наслариз ужуб тербия тувдихьа, ислягьвал ва мясляаьт мюгькам апIидихьа, Дагъустан ихь уьклейин варитIан хатIасуз ва улихьна гъябгъюрайи регионарикан саб хьпан бадали, вари кьувватар жалб апIидихьа», – дупна дугъан илтIикIбаъ.
