Гьаму йигъари «Хивский район» МО-йиъ РД-йин ЦСОН-диъ «Кьабивал шадвал» кIуру акция кIули гъубшну. Акцияйиъ иштирак’вал гъапIу вари касар чпин аьшкьниинди, хушниинди иштирак гъахьидар вуйи.

 

Хив райондин Хив гъулаъ дуланмиш шулайи абйир-бабарихьан дурарин гъахи баяр-шубар ярхлариъ, жара шагьрар-гъулариъ яшамиш хьувализ лигну, хулаъ чвлин ляхнариз кюмек апIру кас адрувал гьисс апIури, 7-8 хизандин яшлуйириз чпин багъ-бистниан кьюрдуз яр-йимишар, мейвйир уч ва сикин апIуз Хив райондин волонтерари, урхурайидари хайлин кюмекар гъапIну.

Гьелбетда, яшлуйир, хабарсузди гъирагъдилан чпиз гъабхьи кюмекниин кьадар адрубкьан рази гъахьнийи. Волонтерар, чпин метлеб кIулиз адабгъури, фужар картфар ктугъуз, сасдар худар утIуз, тмундар гугар хътутIуз ва арфанйирна камадрар уч апIуз хъюгънийи. Мидланра савайи, шубари булагъдилан штар хури, хуларилан бирк алдатури, чIюрх-чIувал али йишвлан мурглар йивури, марццишин апIбан ляхнарра кIули гъягъюрайи. Яшлуйири чпин уьмрикан, кIул`ина гъафи йигъар-йишварикан, чпиз гъябкъю гъагъи деврикан гафар-чIалар апIурайи, кюмекчйири, дурарихъ дикъатлуди хъпехъури, гьар терефнаъ гьяракатниинди ляхнар кIули гъахурайи.

Яшлу касар чпиз гъирагъдилан кюмек имиди гъагъи ляхнар хайлин улихь апIуз гьяракатнаъ айи. Ктугъу картфар, уч гъапIу гугар ва миди вуйи мейвйир хянариккна гъухнийи. Аьхириъ яшлуйири чпиз туву кюмекназ чухсагъул мялум гъапIнийи ва, вичар-жихрар, хифар уч апIру вахтназ сабансана кюмек шлувалик умуд кивурча кIури, зарафатар апIурайи.