Сентябрин вазлин 7-пи йигъан СатIиди вуйи Аьрабарин Эмиратарин меркез Абу-Даби шагьриъ UFC-йин 242-пи талитар кIули гъушну. Му талитариз вари Урусат, хъа варитIан гизаф Дагъустандин халкь, ккилигурайи. ПучIу гъагъ айи спортсменарин арайиъ дюн’яйин чемпионвалин ччвур бадали UFC-йин чемпион, Урусатдин ватандаш Гьябиб Нурмягьямедов ва Америкайин ватандаш Дастин Порье кчIихнийи.
Урусатдин спортсмен учв талитназ удучIву кчIихбариъ затра магълуб гъахьир дар. Э. Яквинта ва Конор Макгрегорихъди вуйи талитариъ Гьябиб Нурмягьямедовди ММА-йин пучIу гъагъ айи спортсменарин арайиъ учв варитIан кIубанур вуйиб улупнийи. Абу-Дабийиъ кIули гъубшу талитнаъ ихь спортсмен Дастин Порьейиин гъалиб гъахьну. Гьябиб Нурмягьямедовди 28-пи гъалибвал гъадабгъну. Урусатдин спортсменди шубубпи раунддиъ бугъмиш апIбан жюрейиинди Америкайин спортсмен ккагъну ва чан гъагънан категорияйиъ дюн’яйин чемпионвалин ччвур гъюбхну. Натижайиъ дугъу 6090000 доллар гъазанмиш гъапIну. Дидин гьякьнаан UFC-йин асас пресс-релиздиъ дупна.
Думу кьадар пуликан 6 миллион доллар гонорар ву, хъа 50000 – талитназ удучIвбаз, 40000 – кчIихбарин улихь кIули гъуху медиа гюрюшариъ иштирак’вал апIбаз тувну.
6 миллион доллар – му UFC-йин тарихдиъ варитIан аьхю гонорар ву. Дупну ккундуки, му гонорарилан савайи, пулихъ телевидениейин трансляция гъубхдарира Гьябиб Нурмягьямедовдиз пул тувди.
Къайд апIувал лазим вуки, Дастин Порьейира му талитнаъ 290000 доллар гъазанмиш гъапIну.
Дагъустан Респбликайин Глава Владимир Васильевди дагъустанлуйир Гьябиб Нурмягьямедовдин гъалибвалихъди тебрик гъапIну. Региондин Главайи Гьябиб Нурмягьямедовдизра тебрикнан гафар хътаъну.
Дагъустандин «Ватан уьбхрур» СОО-йи сатIи вуйи къарар адабгъну, Урусатдин машгьур спортсмен Гьябиб Нурмягьямедов «Дагъустандин намус ва дамагъ» кIуру орден тувуз улупну. Дидин гьякьнаан Мягьямед Танкаевдин Фонднан председатель Гьясангьюсейн Аьбдулжелиловди мялумат тувну. Жямяаьтлугъ сатIи духьнайи тешиклатарин Союздин вакилари ихь дирбаш ватанагьлийиз хъана заан гъалибвалар ва мюгькам сагъ’вал ккун гъапIну.
