РД-йин зегьметнан ва яшайишдин артмиш’валин Министерствойин мялуматарин гъуллугъну «Табасарандин нурар» газатдиз Дагъустандиъ гизаф бицидар айи хизанариз яшайишдин кюмек апIбан гьякьнаан мялуматар тувну.
Мялуматариъ дупнайиганси, гизаф бицIидар айи ва яшайишдин касибвал кайи хизанариз хьурпи ва думутIан артухъ бицIидар бабкан гъахьиш, саб ражари 10 агъзур манат, хъа йицIур ва думутIан артухъ бицIидар бабкан гъахьиш – 300 агъзур манат тувру. Эгер хизандиъ кьюдюхрар бабкан гъахьиш, саб ражари тувру пособиейин кьадар 20 агъзур манат хьибди, хъа сабси шубур ва думутIан артухъ бицIидар бабкан гъахьиш – 100 агъзур манат тувру.
Гизаф бицIидар айи ва касибвал кайи хизандиан бицIир 1-пи классдиз душнаш, бицIирин кIулихъ 2 агъзур манат ЕВД (гьар вазли тувру пул) гъадабгъуз ихтияр а. Гьацдар касибвал кайи хизанариз коммуналин игьтияжарихъан (газдихъан, электроэнергияйихъан) тувру гьякъийин 30% компенсация тувру.
Сарпи бицIир гъахьи ва жара йишвариан бицIир уьрхюз гъадагъу хизанариз 9448 манат пособиера тяйин дапIна. Думу сад йисанна гьацIан тувруб ву.
Пособйир гъадабгъбан бадали, гьаму йисан 1-пи декабриз РД-йин зегьметнан ва яшайишдин артмиш’валин Министерствойин пособйирин отделиз ясана жвув яшамиш шулайи йишваъ МФЦ-йиз лазим вуйи документар тувну ккунду.
Касибвал кайи ва гизаф бицIидар айи хизанариз яшайишдин игьтияжарихъан компенсация чпи яшамиш шулайи йишван муниципалитетарин ва шагьрин округарин агьалйирин яшайишдин тереф уьбхру органари тувру.
