Дербентдиъ деврин тIалабариз жаваб тувру диализ апIру центр ачмиш гъапIну. Центри магьа сарпи аьзарлуйирра кьабул апIура. Шагьрин агьалйириз му аьхю гьядиса гъабхьну, фицики центр ачмиш апIбаз ккилигури, дурарин швнуд-сад йис вуйи.

 

КIваин апIуз ккундучуз, 2016-пи йисан ноябрин вазлиъ шагьрин кIулин больницайин бинайиинди либхурайи гемодиализдин отделение хъябкьнийи. Гьаддихъан мина аьзарлуйир хусуси клиникйириз илтIикIуз мажбур духьнайи.

Диализ апIру центр ачмиш апIували гурдмар иццурайивалиан республикайин меркездиз диализ апIуз гъягъюрайи аьзарлуйирин рякъ жикъи гъапIну. Шагьрин больницайин коллектив ва шагьрин агьалйир му шадлугънан дюшюшдихъди тебрик апIуз республикайин агьалйирин сагъламвал уьбхбан министр Жамалудин Гьяжиибрагьимов гъафну.

Отделение кьюб сменайиъ либхуру. Душваъ аьзарлуйир йишвнура, йигънура кьабул апIиди. Палатйириъ гъамусдин деврин аппаратар – табии дару гурдмарин сяняаьтар дивна. Сабпи мертебайиъ йишвнура, йигънура диализ апIуз лазим вуйи кислотайин растворар гьязур апIру миксер ва шид марцц апIру сяняаьтар айи, мюгькамди хъябкьнайи хал а.