Улихьна йигъари Табасаран райондин Хючна гъулан 1-пи ва 2-пи нумрайин ва гьацира ТIивак, Хянягъ, СиртIич гъуларин кьялан мектебариъ цифрайин ва инсан ва дугъан меденият ахтармиш апIру цирклариан аьгъювалар гъадагъбан «Точка роста» кIуру образованиейин центрар аьхю шадлугъниинди ачмиш гъапIну.
Хючнаарин 1-пи нумрайиъ мектебдиъ мициб центр ачмиш апIбан серенжемдиъ Табасаран райондин глава Мягьямед Къурбанов, райондин образованиейин управлениейин начальник Аьбдусалам Гьясанов, райондин администрацияйин КСО-йин кIулиъ айи Иса Исаев ва жара касар иштирак гъахьнийи.
Пуб лазим вуки, федералин «Гьамусдин деврин мектебар» ва милли «Образование» проектарин дахилнаъди Табасаран райондиан улупнайи проектдиъ зиихъ къайд дапIнайи 5 мектеб иштирак гъахьну.
Центр ачмиш апIбаз бахш дапIнайи серенжем абццри, Мягьямед Къурбановди мектебдиъ лихурайи мялимар ва урхурайи баяр-шубар центр ачмиш апIбахъди тебрик гъапIну. Дугъан гафариинди, гъулан мектебариз му проект гизаф мяналуб ву. Фицики, гьамцдар центрар ачмиш апIували гъулариъ айи бицIидаризра цифрайин инсан ва дугъан меденият ахтармиш апIбан, гьацира табии илмариан аьгъювалар гъадагъуз мумкинвал тувра. Мягьямед Къурбановди къайд гъапIганси, му ляхин хъайисанра давам хьибди.
Табасаран райондин УО-йин кIулиъ айи Аьбдусалам Гьясановди уч духьнайидариз центр яратмиш апIбан метлебнакан ва дидин ляхникан ктибтнийи.
«Цци ихь райондиъ «Точка роста» кIуру 5 центр ачмиш гъапIну. Гьарсаб центриз 1 миллионна 600 агъзур манат жара дапIна. Улупнайи кьадар дакьатар лазим вуйи къайда-йиинди харж дапIну, центрар гъийин деврин тIалабариз жаваб тувру лазим вуйи вари шей’арихъди тямин дапIна, ва дурарин асас метлеб – урхурайидарин аьгъюваларин дережа за апIувал ву», – гъапнийи дугъу.
Чан терефнаан Хючна-арин 1-пи нумрайин мектебдин директор Жейран Къулиевайи райондиъ образование артмиш апIбаз гьамциб аьхю фикир туврайивализ ва гьаму жюрейин проектариъ иштирак хьуз кюмек тувбаз райондин глава Мягьямед Къурбановдиз чухсагъул мялум гъапIну.
«Саб бицIи вахтнан арайиъ райондин главайин ва мектебдин коллективдин кюмекниинди «Точка роста» центр ачмиш апIру йишв ккабалгуз гъабхьну. Му центриз гьацира «технология», «информатика» ва «ОБЖ» предметарин кабинетарра дахил шула. Хъа мушваъ лихру мялимар, «Кванториум» технопаркдиъ чпин аьгъюваларин ери за дапIну, сертификатар гъадагънайи мялимар ву.
Гьамцдар шартIар тикмиш апIбан кьяляхъ, мушваъ урхурайи вари ученикари ич кIван мурадар кIулиз адагъну, ужудар натижйир улупиди кIури, умуд кивраза», – гъапнийи Жейран Къулиевайи.
Серенжемдин иштиракчйир удучIвну улхбан кьяляхъ, уьру рангнан лента гьадабтIну, центр ачмиш гъапIнийи ва уч духьнайидар вари дидиз лигуз айитI учIвнийи.
