Гьюрматлу ватанагьлийир!

Табасаран район арайиз гъафихъан мина 90 йис тамам хьувал мубарак ибшри!

90 йисандин арайиъ райондин агьалйири аьхю ва баркаллу рякъ ккадапIну. Вари уьлкейихъди, республика-йихъди райондин агьалйири Ватандин Аьхю дявдин женгариъ чпин вафалувал улупну, халкьдин мяишат таза кIул’ан цIийи алапIну. Гъи ухьу ихь Табасаран райондин ругариин баркаллу зегьмет зигурайидариинди, чпин хъуркьувалариинди аьхю Урусатдин Федерацияйин жара регионар машгьур апIурайи ихь ватанагьлийириинди дамагъ апIурахьа. Гьарганси, гьамусра ухьу жигьиларик аьхю умуд киврахьа. Жигьилари цIийи уьмур, гележег тикмиш апIиди, ва думу фициб шулуш, жигьиларикан асиллу ву.

Гьаму йисарин арайиъ райондин экономикайин ва яшайишдинна культурайин артмиш’вал гизаф дигиш гъабхьну. Дигиш дархьиди гъубзуб – агьалйирин райондихьна вуйи ккунивал ву. Табасаран район – му инсанарин, насларин, кьисматар, хасиятар сатIи апIурайи ихь уртагъ хал ву.

Гъи ихь Табасаран райондин улихь-кIулихь хьайидари, аьсрариан ухьухьна дуфнайи ужудар аьдатар уьрхюри ва артмиш апIури, гележегдиъра табасаран халкь хъуркьуваларихъна хпан бадали, мюгькам шибритI ккивра.

Гьюрматлу дустар! Ихь бицIи баб – ватан бадали райондин артмиш’валик пай киврайи вари халкьдиз Табасарандин 90 йисандин юбилей мубарак апIурача. Райондиз артмиш’валин кIакIнаъ хьувал, хъа агьалйириз мюгькам сагъ’вал, ужудар гьядисйир, хушбахтлу гележег ккун апIурача!
Гъит, мяълийик дупнайиганси, Табасаран район ужуб-харжиб аьгъю касдиз гюзел йишв вуди гъубзри гъира, гележегдиъра.

 

Газатдин редакцияйин коллектив