Гъябгъюрайи йисан октябрин 25-27-пи йигъари ихь республикайиъ футболиан талитар кIули гъягъиди. Гьадму талитар гьисабназ гъадагъну, Хив райондин администрацияйин, «Хив райондин жигьилар» ДРОО-йин ва Хиварин М. Шамхаловдин ччвурнахъ хъайи мектебдин терефнаан къарарар адагъну, Хив гъулан стадиондиин футболин турнир кIули гъубшнийи.
Турнир ачмиш апIуз сифтейин гаф райондин главайин заместитель Мирзабег Багъичевдиз тувнийи. Чан улхбаъ дугъу гъийин йигъан спортди инсаниятдин арайиъ, ихь уьмриъ фициб роль уйнамиш апIураш, гьаддикан гъапнийи.
«Ухьу гъийин турнир арайиъ мясляаьт ади зегьмет дизигну, талитнаъ айиб гьисаб дапIну, аьхю гьевесниинди ва дюзвал ади дубхну ккунду. Фицики, ухьу ихь райондин турнириъ гъалиб гъабхьи команда республикайиъ кIули гъягъру талитариъ иштирак хьуз гьапIну ккунду. Гьаци вуйиган, учвкан, саб улхуб-рахубра адарди, лазим вуйи къайдайиинди гъийин турнир кIули гъабхувал ккун апIураза», – къайд гъапIнийи М.Багъичевди.
Турнириъ райондин хьуб гъул`ан вуйи мектебарин командйир иштирак гъахьнийи: Хиварин, АрхътIарин, Чювккарин, Хиржварин ва Асккан Ярккарин. Дурар чиб-чпихъди таниш апIури, турнирин лазим вуйи ва дюрхну ккуни къайдйирикан «Хив райондин жигьилар» ДРОО-йин кIулиъ айи Мустафа Сеферов, Хиварин кьялан мектебдин директорин тербияйин ляхин кIули гъабхурайи заместитель Рауф Аьгьмедов ва турнирин судья Султан Юсуфов гъулхнийи.
Талитарин натижайиъ 1-пи йишв Хиварин кьялан мектебдин футболин командайи гъадабгънийи, 2-пи йишван сагьиб Чювккарин кьялан мектебдин команда гъабхьнийи, хъа 3-пи йишв АрхътIарин кьялан мектебдин командайи гъазанмиш гъапIнийи.
Турнириъ гъалиб гъабхьи ва пешкешнан йишвар гъадагъу командйир юкьяр дисбаан спортдин мастер, спортдин мектебдин тренер Гьяжи Гьяжиевди, Хив райондин главайин заместитель Мирзабег Багъичевди дипломариинди ва пешкешариинди лишанлу гъапIнийи.
Вари тамашичйирин, иштиракчйирин ва кьимат диврайи касарин фикриинди, турнириъ ужуди футбол уйнамиш гъапIу касарикан аьхюну пай Хиварин командайиан вуйи. Республикайин талитариз гъягъяйиз, жюрбежюр командйиригъян гъядягънайи ужударсдар футболистарикан гъудубкьу команда дюзмиш дапIну, дурар ягъурлу рякъюъ тIаъну ккунду.
Ихь баяриз ягъурлу рякъ, хъуркьувалар, ужудар сяътар ва Хив райондиз гъалибвал хру агьалйир хьувал ккун апIурхьа!
