Ухьу фикриз фунуб уьлке, фунуб миллет гъадабгъишра, сифтена-сифте гьадму халкьдин арайиан вуйи машгьур касар, политикар, гьякимар, девлетлу дилаварчйир кIваина гъюрихь. Дугъриданра, гьарсаб халкьдин арайиъ кьягьял, дирбаш игитар, жумарт юкIв айи инсанар, фикирлу аьлимар, зигьимлу политикар, ватандин артмиш’валик баркаллу зегьметнан пай киври лихурайи лайикьлу баяр а. Табасаран миллетра чан игитариинди дамагълу ву.

Учу «Табасарандин нурар» газатдин «Яв баяр, Табасаран» кIуру рубрикайиъ хайлин ихь лайикьлу баярихъди учву таниш гъапIнийча. Гъийин йиз макьалайин игит, Зульфикьар Аьлимягьямедов, думу баярин жергейиъ лайикьлуди улупуз шулу, фицики дугъан ччвур Санкт-Петербург шагьриъ гизафдари дамагълуди ва ихтибарлу касдинубси бисура.

Зульфикьар Алимягья-медов Табасаран райондит Туруф гъул’ан ву. Думу Санкт-Петербург шагьриъ «Кафари ямаж» кIуру спортдин, туризмдин ва рягьятвал гъадабгъру комплексдин идара апIру директорди лихура.

Сабпи ражари Санкт-Петербергдиз Зульфикьар Севастополь шагьриъ эскервалин барж тамам дапIну, чан чуччухьна улукьуз кIури, гъафнийи. Думуган, 1990-пи йисари, мобильный телефонар адайи. Рякъюъ айирин, чазра хабар дарди чи яшамиш шулайи йишван адрес кайи кагъаз дудубгну, чи айи йишв абгури, дугъан кьюб ваз гъабхьнийи. Гъи думу вахтар Зульфикьари аьлхъюб кади кIваина хура. Бязиган дугъаз йишв наан адапIуруш дибрихъру дюшюшарра алахьнийи. Амма дугъаз сабдихьанра гучI гъабхьундар. Чан фикир ва лихуз ккунивалихьна вуйи аьшкь гъурдаъ дючIюркьну, думу читинвалариан удучIвури гъахьну. Йигъ-йишв дарпиди лихурашра, пише гъадабгъузра вахт дабгну, сифте Зульфикьар Аьлимягьямедовди хябяхъдин мектебдин курсар, хъасин Санкт-Петербургдиъ Лесгафтдин ччвурнахъ хъайи физкультурайинна спортдин академия ккудукIуру. «Кафари ямаж» кIуру турбазайиъ лихувал Зульфикьари сифте инсанарин хатIасузвал уьбхру гъуллугънан начальникдин вазифйир тамам апIбалан ккебгънийи. Яваш-явашди дугъу учв заан гъуллугъариъ лихуз шлу, фунуб-вушра ляхин тамам апIуз удукьру пишекарси улупну. Гъи дугъу гьадму турбазайиз регьбервал тувра ва душваъ спортдин 20-дихьна жюрбежюр мектебар арццна. Спортдин гьарсаб мектебдиз чан директор, тренерар, инструкторар а. Кьюрд-хьад дарпиди, рягьятвал гъадабгъуз, спортдиин, физический культурайиин машгъул хьуз гъюрударин кьадар артухъ шула. Багахь гележегдиъ Зульфикьари хоккей, фигурный катание, балет уйнамиш апIуз ккунидариз мектеб-конкйир яртру майдан абццуз планламиш дапIна.

Йиз фикриан, инсандин хъуркьувалар гизафси хизандиъ туву тербияйикан асиллу шула. Зульфикьар Аьлимягьямедовдин аьхю ва албагу хизан ву. Дугъаз 4 гъардаш ва 6 чи а. Дурарин адаш Гьяжизал хайлин йисари Табасаран райондин яркврарин мяишатдин начальникди гъилихнийи. Хъа гьадму саб вахтна, Гьяжизал халу, Новочеркасск шагьриъ ярквран мяишатдин ва техникайин университет ккудубкIну, Табасаран райондиъ заан пишекарвалин образование гъадабгъдариканра сарпир вуйи. Гьамусяаьт дугъан 80 йис шула. Дада Гюлдесте ужуб юкIв айи, жарарин дерд чанубси гьял апIру, халис дагълу табасаран дишагьли ву. Чан вари уьмур дугъу халачачивализ ва хизандин айитI мани гьиссарин цIа зяиф дархьбаз бахш гъапIну. Гюлдесте хала гьадмукьан сабурлу теклифар ва насигьятар тувру, фикирлу дишагьли ву. Гъира дугъахьна чпин дерди гьял апIуз ва дугъан насигьятнахъ хъпехъуз инсанар гъягъюри шулу. Гьадму саб вахтна халачйирин фабрикйир хъяркьюз, халачйирин кьимат ис абхъуз хъюгъиган, Зульфикьарин аьхюну гъардашлугъ Аьрифди, учв артелин директор вуйи вахтна, чан жягьтлувалиинди багъри гъулаъ гьадму артель уьбхюз гъайгъу гъизигнийи.

«Санкт-Петербург шагьриъ чан хизанарихъди йиз аьхю чи ва сарнур гъардаш яшамиш шула. Йиз улихь диву ляхин сифте чуччуз ва гъардшиз ктибтури шулза. Багъри касари ужуб ва харжи терефариз гьякьикьи улариинди лигуз кюмек тувру», – кIура Зульфикьари.

Зульфикьарин спортдин комплексдиз хайлин машгьур спортсменарси, адлу жямяаьтлугъ касарси, дагъустандиъ спортдиин машгъул хьуз мумкинвал адру жигьиларра гъюри шулу. Дугъу баярихьна лазим вуйибкьан вахтназ аьхю ва вари жюрейин спортдин алатар айи, деврин тIалабариз жаваб тувру спортдин зал тувна. Гъулариан, Дагъустандин шагьрариан Санкт-Петербургдиз гъафи, гъягъюз хал-йишв адру хайлин жигьилариз Зульфикьари кюмекнан хил гьачIабккну. Дагъустандин диаспорайи гъабхурайи гьарсаб мяракайинра думу жанлу иштиракчи ву.

«Учу гьаци вердиш гъахьунча. Хулаъ хялижв адру йигъ шулдайи. Дадайи, аьхюр-бицIириз гьюрмат ади гъузай, гьюрматнахъ хъубкьруб адар. Думу учвухьна Аллагьу Тяаьлайи швнуб-саб ражари артухъди хътабкуз гъитди. Жарариз кюмек апIру касдин хул’ан девлет, берекет кам шулдар, кIури гъахьну. Узу дадайин гафар йиз уьмрин девизси дибисназа ва гьаци йиз веледарра тербияламиш апIураза. Ич абйир-бабаризра 11 велед айи хизан уьбхюз фукьан-вушра читинвалар алахьну. Дурари бицIивахтнахъан мина лихуз, гъазанмиш апIуз, ляхнихьан гучI дарапIуз улупунчуз. Ич абйирин гьаммишан арфар ади гъахьну. Узу гьадму йиз ата-бабйири уьбхюри гъабхьи арфарин сихил ккутIударза кIури, гьамушваъра дурар уьрхюраза. Йиз уьмрин юлдаш Эльмирайи ва узу хулаъра веледарихъдира анжагъ табасаран чIал апIурча.

Узуз гьамциб мумкинвал ккабхъну амиди, Санкт-Петербург шагьриъ яшамиш шулайи йиз халу Нефтуллагь Гьяжиев кIулиъ ади, узуз кюмек гъапIу вари баяриз чухсагъул пуз ккундузуз. Мидланра гъайри, ихь табасаран жигьилариз насигьят вуди билиг гъадабгъбаз, физкультурайиин машгъул хьпаз вахт гьяйиф дарапIувал ккун апIураза. Гъи аьгъювалариан ва физический культурайин цирклиан кьяляхъ гъузрайи жигьилариз яшамиш хьуз гъагъиди ву. Вари йиз табасаран жямяаьтдиз сабпи нубатнаъди сагъ’вал, кьюб кIуруб – кIван шадвал, шубубпиб – марццишин ккун апIураза.

ЦIиб улихьнаси узу райондиз гъушнийза. Гьадушваъ улихьна йисаритIан гьамус зир зибил артухъ дубхьнайивал гъябкъиган, кIваз иццру гъапIнийиз. Дидиз Урусатдиан гъафи гизаф баяри фикир тувну. Узу вари Табасарандикан улхураза. Йиз Ватан узуз мублагъди ва успагьиди артмиш дубхьну ккундийзуз. Гьаци хьибди кIури, умудра кивраза», – гъапну сюгьбатнан аьхириъ Зульфикьар Аьлимягьямедовди.

Зульфикьарин умудар ужудар ву. Гъит, дурар кIулиз удучIври.