Гъийин деврин жигьилар, гизафси шагьрариъ яшамиш шулайидар, телевизориз затра лигури амдар. Фицики, дурарин гьарурин хилиъ интернет айи телефон а, хъа думу телефондиан лазим вуйи вари мялуматар гъадагъуз, Турцияйин сериаларизра фуну вахтна вушра лигуз шулу. Гьаци вуйиган, жигьиларин фикриинди, телевизор анжагъ бицIидариз мультфильмариз лигбан бадалитIан лазимди амдар. Му, икибаштIан, гъийин деврин сасдар жигьиларин фикир ву. Хъа аьхю яшнан инсанари дици фикир апIурадар. Гизаф йисари телевизориз лигури вердиш духьнайи инсандихьан телевизор чан уьмриан думукьан рягьятди идипуз шулдар.
2019-пи йисан октябрин вазлиъ эфирин аналогдин телевидение хъябкьрайиваликан туврайи мялуматари гизаф инсанарик гъалабулугъвал кипнайи. Дурар шлу дигиш’валарин бегьемди гъавриъ ахънадайи.
Хъа магьа вари Урусатдиъ аналогдин телевидение хъябкьну, цифрайин телевидениейихъна гъафну. Му гьамусдин деврин тIалаб ву. Ихь гъунши харижи уьлкйириъра кмиди цифрайин телевидениейитIан ляхин апIури амдайи, дурари Урусатдиканра деврин тIалабар тамам апIувал ккун апIури, гизаф йисар вуйи.
Урусатдиъ КитайиътIан, ИндияйиътIан, БразилияйиътIан ва 120 уьлкейиътIан ухди аналогдин телевидение хъабхьну.
Октябрин 14-пи йигъан Дагъустандин Правительствойин Председателин заместитель Владимир Лемешкойи къайд гъапIганси, республикайиъ цифрайин телевидениейи ляхин апIбан бадали, гизаф зегьмет дизигна. Федералин каналар агьалйирихьна цифрайиинди хъуркьбан бадали, 1 миллиардна 200 миллион манат харж дапIна. Дагъустандиъ РТРС-ди варитIан гизаф объектар – 150-тIан артухъ радиотелевидениейин станцийир айи цифрайин эфирин сеть арайиз гъабхну. Мушваъ Урусатдиъ варитIан кьибла ва Европайиъ варитIан ягъалди дийибгънайи телебашня дивна. Думу телебашня гьюлихьан 2565 метр ягълишнаъ Кьуруш гъулаъ дивна. Гьелбетда, фукьан гизаф зегьмет дизигнашра, цифрайин телевидение чпихьна дурубкьну адру инсанарра гъузна. Дурар йирси телевизорариз лигурайидар, цифрайин сигнал хъудрубкьру йишвариъ яшамиш шулайидар ву. Хъа дицисдарин кьадар лап цIибтIан дар. Республикайин агьалйирихьан пулсузди ва лап марцциди 20 программайиз лигуз шулу. Узу агьалйирикан, цифрайин телевидениейихъна гъюбахъди аьлакьалу вуди, чпин фикрар ачухъ апIувал ккун гъапIнийза. Дурарикан сасдарин фикрар исихъ чап апIурача.
Ибрагьим, 40 йис, Мягьячгъала шагьур: «Узу Триколор ТВ-йиз лигури гизаф йисар вуйиз. Хъа гьар йисан Триколориз пул тувну ккунду. Пулсузди 20 программа марцциди улупури гъахьиш, триколор ТВ зат лазимди гъубзидар. Гъюру йисхъан тина узура цифрайин пулсузди вуйи 20 программайиз лигуз хъюгъбанди вуза. Телевизор цIийи девринуб ву. Цифрайин каналарин сигнал бисуру».
Марина, 50 йис, Дербент шагьур: «Улихьна йисари телевизори ужуди улупури шулдайи, чIатан антенна дивнашра, телевизорин шиклин марццивал адайи. Кми-кмиди антенна микIари убгъюрира шуйи. Гьаддиз ич хизанди кабелин телевидениейиз пул туври, гьадрари учу программйирихъди тямин апIури гъахьну. Гьамусра кабелин телевидениейиз лигури имича. Цифрайин пулсуз каналар му аьхю кюмек ву. Узуз, дугъриди гъапиш, аналог фила хътабтIнуш, хабаркьан адарзуз».
Гюлханум, 42 йис, Мягьячгъала шагьур: «Учу 2015-пи йисан цIийи телевизор гъадабгъиган, гьадди, чIатан антенна хътаршра, марцциди программйир улупуйи. Узу думуган мюгьтал гъахьнийза. Гьадмуган сабпи ражари цифрайин телевидениейикан гъеебхьнийиз. Дугъриди гъапиш, бязи вахтари 10 программатIан улупури шулдайи, хъа гьамус дици амдар. Вари 20 программа марцциди улупура. Гьаддиин узу гизаф шуд вуза».
Шамил, 65 йис, Табасаран район: «Йиз телевизорихъ Триколор ТВ хъа. Узу гьаддихъди вердиш духьназа. Гьелбетда, пулсузди 20 программа марцциди улупувал – му аьхю хъуркьувал ву. Узу телевидениейиан мялуматарихъ гизаф хъпехърур вуза. Цифрайин телевидениейин девир улубкьувалиин гизаф шад вуза. Хъа, фукьан телевизориз лигурушра, узу газатарра урхрур вуза. «Табасарандин нурар» газатдин аьхю дустра вуза. Гьар йисан думу подписка апIури ва почтальондикан йиз хилиз рубкьувал ккун апIури, аьхю аьшкьниинди ичв макьалйир урхури шулза».
Саида, 35 йис, Хив район: «Узу телевизориз гизаф лигрур дарза. Дугъриди гъапиш, бицIидар айи хизандиъ телевизориз лигуз гизаф вахтра шулдар. Хъа гьамус узусдар жигьиларихь интернет айи телефонар хьа. Вахт ккабхъиган, жюребжюр хабрар, мялуматар телефондиан аьгъю апIури шулза. Асас вуди бицIидар телевизориан мультфильмйириз лигури шулу».
Магьа, узу чпихьна суалар хьади илтIикIу касари узуз гьамцдар жавабар тувну. Гьаму жавабариан мялум шулайиси, ихь республикайин агьалйириз аналогдин телевидение хъябкьюваликан гизаф хажалат ктар, фицики аьхюну пай инсанар гъийин деврин цIийи телевизорариз лигура. Гьаму федералин 20 программайиз пулсузди лигурайидариз ихь республикайин РГВК-йин программйириз лигуз шули адруваликан фикир ка. Гьадму месэлара РГВК-йин кIулиъ айидар республикайин гьюкуматдихьна илтIикIну гьял апIувал ккун гъапIну. Ноябрин 25-пи йигълан башламиш дапIну, ОТР программйир хьуб сяаьтди хъяркьну, дурарин ерина РГВК-йин программйир тувбанди ву.
