Октябрин 25-пи йигъан Дербент шагьриъ, Дагъустандин ва багахь хьайи жара уьлкйирин ужударсдар 18 спортсмен иштирак духьну, ММА спортдин FCA-3 талитар заан дережайин тешкиллувалиинди кIули гъушнийи. КчIихбариъ вари иштиракчйири чпин дирбаш’вал улупнийи. Думу талитарин тешкилатчи Калининград шагьриъ яшамиш шулайи ихь ватанагьли, «Аслан» клубдин кIулиъ айи Вадим Асланов вуйи.
Дугъкан, «Табасарандин нурар» газатдин редакцияйиз дих дапIну, чав гъабхурайи ляхникан ктибтувал ккун гъапIнийча. Вадим Аслановди ич суалариз туву жавабар вари сатIи дапIну, сабишв’инди исихъ туврача.
– Узу Табасаран райондин Хянягъ гъулаъ бабкан гъахьунзу. БицIивахтнахъан мина спортдиин машгъул вуза. Мектеб ккудубкIиган Калининграддиз гъушур, ду-шваъ гъузунза. Армияйиъ гьюлин пияда кьушмин частнаъ йиз буржи тамам дапIну кьяляхъ гъафир, Калининграддиъ бицIидариз спортдиин машгъул хьуз кюмек туври, дурар вердиш апIури гъахьунза. 2007-пи йисан киокушинкай каратэйиан «Аслан» кIуру клуб ачмиш гъапIунза.
Ухьуз варидариз мялум вуйи Гьябиб Нурмягьямедов Конор Макгрегориин гъалиб гъахьиган, дугъаз ва дугъан дестейиз Калининграддиз теклиф апIбан бадали, чемпиондин тренер ва адаш Аьбдулманап Нурмягьямедовдихъди гюрюшмиш гъахьнийза. Дурарин гьюрматназ Калининграддиъ талитар тешкил апIбанди вуйза. Аьбдулманап Нур-мягьямедовди разивал тувнийи, ва дурарин десте Калининграддиз гъафиган, сабпи турнир тешкил гъапIнийза. Калининграддиъ спортсменарин арайиъ гьар шубуб вазлик спортдин ММА жюрейин кчIихбариан талитар гъахури шулча. Нубатнан ражари гъубху Гран-при турнириъ Багьаудин Абасов гъалиб духьну, дугъу кагьрабайин чIул гъадабгънийи. Октябрин 25-пи йигъан Дербент шагьриъ FCA- 3 талитар тешкил гъапIунча. 23-пи ноябриъра Каспийск шагьриъ Аьли Аьлиевдин ччвурнахъ хъайи спорткомплексдиъ талитар гъахувал планламиш дапIнача. Хъасин сабсан турнир Казахстандиъ тешкил апIбанди вуча.
Гьарсаб серенжем тешкил апIруган, икибаштIан, пулин гизаф дакьатар лазим шулу. Кюмек туврудар адарди талитар тешкил апIуз ва гъахуз читинди алабхъуру. Дербентдиъ талитар гъахруган, пулин кюмек тувур Казахстандиъ яшамиш шулайи ихь ватанагьли Идрис Аьлибегов вуйи. Хъа талитарин тешкилатчийи гъирагъдиан пулин кюмек адарш, чан дакьатариинди вушра талитар духну ккунду. Гьарган сабси шлуб дар.
Узу тешкил апIурайи талитариъ гьарган ихь табасаран баяр иштирак шулу. Узу, адлу спортсменаризси, тазади спортдиин машгъул духьнайидаризра чпик кайи бажаранвал, кьувват ва устадвал улупуз, хъа тамашичйириз кчIихбарикан мянфяаьт ктабгъуз мумкинвал тувуз чалишмиш шулаза. Рягьимлувалин кюмекназ ккилигурайидарра учкан рази апIуз мумкинвал абгурча.
Читинваларра алахьуру. Мицдар серенжемар тешкил апIру йишв талитар гъахуз гьарган гьязурди шулдар. Му месэла гьял апIбан бадали, жавабдарвал гъабхурайи касдихъди йикьрар йитIузра читинди шулу. Гьаддиз саспиган талитар гъахурайи шагьрин кIулиъ айидарихьна илтIикIувал алабхъуру. Дербентдиъ талитар гъахруган, шагьрин мэр Хизри Абакаровди, ихь ватанагьли Айваз Аьлихановди, ГОВД-йин начальникдин вазифйир тамам апIурайи Рягьман Рамазановди талитар тешкил апIуз гизаф кюмек гъапIнийчуз.
Каспийскдиъ талитар тешкил апIбан бадали, Аьли Аьлиевдин ччвурнахъ хъайи спорткомплекс 23-пи ноябриз арендайиз гъадабгънача. Талитариъ ужудар хъуркьувалар улупурайи спортсменар иштирак хьиди. Тамаши апIуз ккунидариз талитариз лигуз теклиф апIурача. Рягьимлувалин кюмек тувузра гьязурди ача.
