Жвуван ватандин, райондин артмиш’валик пай киврайи зегьметкешарикан, лайикьлу ватандашарикан, тяриф апIбан бадали ваъ, хъа жарадариз дурарин баркаллу ляхнин натижйир улупуб метлеб вуди, учу кми-кмиди бикIурача. Гъийин йиз макьалайин игит ЦIийи Уренгой шагьриъ яшамиш шулайи Табасаран райондин Ярса гъулан вакил Селим Селимов ву.
Багъри гъулаъ мектебдиъ дурхну, Селимди Мягьячгъала шагьриъ ДГУ-йин географияйин факультет ккудубкIуру. Эскервалин буржи тамам апIбан кьяляхъ, думу Тюменский областдиъ, Ямало-Ненецкий ва Ханты-Мансийский автономный округариъ жюрбежюр гъуллугъариъ гъилихну. Хайлин йисари ЦIийи Уренгой шагьрин «АБО» гьясиллувалинна тикилишчивалин фирмайин Сургут шагьриъ ерлешмиш дубхьнайи филиалин директордира гъилихну.
Улихьна йисари Урусатдин Федерацияйин промышленностдинна энергетикайин министрин къарарниинди Селим Селимов, хайлин йисари гъабхурайи баркаллу зегьметназ, уьлкейин тикилишчивалин циркил артмиш апIбак киврайи лайикьлу пайназ лигну, «Урусатдин лайикьлу тикилишчи» ччвур, медаль ва гьюрматнан грамотйир тувбиинди лишанлу гъапIну.
Гьамусяаьт Селим Мустафаевич ЦIийи Уренгой шагьриъ «Трансспецстрой» ООО-йин генеральный директор ву. Асас вуди дугъан тешкилатди «Газпром» компанияйихъди ляхин гъабхура: компрессорный станцйир, рякъяр, гъядар, промышленностдин цирклиан вуйи тикилишар тикмиш апIура. Хайлин ихь табасаран баяриз дугъу ляхин тувну, чахъди сатIиди лихуз йишвар гъагну.
Къайд апIуз ккундузузки, Селим Селимовди, чан багъри гъулан аьтрафариин жил арендайиз гъадабгъну, йимишарин зурба багъ кивну. Табасаранарин арайиъ дугъаз аьхю гьюрмат а. Селимди чан уьмрин юлдаш Марьямдихъди шубур велед тербияламиш апIура. ЦIиб улихьнаси Селимдин кюмекнинди Ярса гъулан аьтрафариин тIумтIин багъларра кивну. Багахь гележегдиъ дугъан йимишар гьясил апIру аьхю парник тикмиш апIуз пландик ка. Гьелбетда, цIийи лихру йишвар арайиз гъиди, гъуландариз аьлава гъазанжарра хьиди.
Гьамусяаьт учв лихурайи циркликан улхури, Селим Селимовди гъапиганси, тикилишчивалин рынокдиъ гъи дурарин тешкилатди ужуб ад гъазанмиш дапIна. Дурарин компанияйи ляхин вахтниинди, намуслуди, мюгькамди, саб гъалатIра ктарди тамам апIура. Дурарин асас заказчикар «Газпром», «Роснефть» ва думу тешкилатарин филиалар ву.
«ЮкIв хъади зегьмет зигру касдиз фунуб вушра цирклиъ хъуркьуваларихьна рякъ абццну шулу. Узу ихь жигьиларикан жвуву кадабгънайи пишейиан ужудар аьгъювалар гъадагъуб, чпин мумкинвалар улупуб, нач, гучI гъирагъдиъ гъитну, хилар хъиржвну зегьмет зигуб ккун апIураза. Думуган, фунур вушра кас чан гъулан, райондин дамагъ хьиди», − гъапну йиз сюгьбатчийи.
Хъа Селим Селимовдин гафарихъ хъугъуз ва дурар уьмриз дарсарди дисуз шулу. Фицики думу учвра жвуван зегьметниинди гъи хъуркьуваларихъна гъафну. Хъа уьлкейиъ улихь хьайи тешкилатари сатIиди лихбан йикьрар йитIуз хил анжагъ хъугъ’вал али ихтибар инсанарихьнатIан гьачIабккудар.
