Хив райондин администрацияйиъ райондин депутатарин сумчIурна ургубпи собрание кIули гъубшну. Собраниейиъ кьюб суал гьял гъапIнийи: «Хив район» МО-йин депутатарин Собраниейин председатель ва Гюзчивалинна гьисабнан палатайиз регьбервал тувру касар ктагъувал.
КIваин апIуз ккундузузки, Гюзчивалинна гьисабнан палатайин кIулиъ айи Талиб Рамалданов, жандин сагъламвал адрувализ лигну, чан хушниинди ляхниан удучIвнийи. Хъа улихьси ктагъу райсобраниейин председатель, ляхнин вахт ккудубкIайиз, чав аьрза тувну, удучIвнийи.
Собраниейиъ депутатари райондин депутатарин собраниейин председателди Исрафил Садикьов, хъа Гюзчивалинна гьисабнан палатайин регьберди Абидин Аьбдулязизов ктагънийи.
Райондин глава Ярмет Ярметовди райондин депутатарин ва администрацияйин терефнаан дурар цIийи гъуллугънаъ дерккувалихъди теб-рик ва цIийи гъуллугъчйирикан Хив райондиз хайир хру касар хьувал ккун гъапIнийи.
