Ноябрин 13-пи йигъан Дагъустандин гьюкуматдин медицинайин университетдиъ Табасаран райондин глава Мягьямед Къурбанов ва РД-йин сагъламвал уьбхбан министр Жамалудин Гьяжиибрагьимов университетдиъ урхурайи Табасаран райондиан вуйи студентарихъди гюрюшмиш гъахьну. Гюрюшдиъ ДГМУ-йин ректор Сулейман Маммаевра, Табасаран райондин больницайин кIулин духтир Абсеретдин Мирзабеговра иштирак гъахьнийи.
Серенжем ачмиш гъапIу Сулейман Маммаевди вуздиъ гъягъюрайи дигиш’валарикан, студентарихъди гъабхурайи ляхникан, РД-йин сагъламвал уьбхбан Министерствойихъди айи чпин аьлакьйирикан, гъулариъ духтрар гьуркIри адрувализ лигну, уьмриз кечирмиш апIурайи «Земский духтир» программайикан ва хайлин жара месэлйирикан ктибтнийи.
Студентарин улихь Мягьямед Къурбановра удучIвну гъулхнийи. Дугъу Табасаран райондикан, душваъ шулайи дигиш’валарикан, муниципалитетдин медицинайин идарйирикан, духтрарин маважибдикан мялуматар тувнийи. Муниципалитетдин главайи учв РД-йин НС-дин депутатди лихурайи вахтна ДГМУ-йиъ Табасаран райондиан вуйи, заан хъуркьувалариинди урхурайи студентариз кюмек апIури гъахьиваликан, думу кюмек гъира давам апIуз гьязур вуйиваликан гъапнийи. Чан улхбан аьхириъ дугъу студентарикан ужудар пишекрар хьувал ккун гъапIнийи.
Чпин пише вуди духтирвал кадабгънайи студентарихьна сагъламвал уьбх-бан министр Жамалудин Гьяжиибрагьимовра илтIикIнийи. Дугъу ДГМУ-йиъ ужудар пишекрар хьуз вари шартIар айивал къайд гъапIнийи. Университетдиъ урхурайидарикан тIалаб апIурайиб – улихь метлеб дивну, кIваантIан зегьмет зигури, думу метлебнахьна гъягъювал ву. Министри «Земский духтир» программайикан, гъулариъ лихру духтрариз туврайи кюмекнакан яркьудиси ктибтнийи.
Му улхбарин кьяляхъ студентари ва ординаторари ректориз, министриз ва райондин главайиз жюрбежюр суалар тувнийи. Суалар гизафси ляхниъ дийигъбан, гъулариъ яшамиш хьпан, «Земский духтир» программайин мумкинваларин месэлйириз бахш дапIнайи.
Серенжемдин аьхириъ муниципалитетдин главайи Табасаран райондиан вуйи ужударсдар студентариз гьюрматнан грамотйир, хъа Сулейман Маммаевди дуфнайи хялариз бицIи пешкешар тувнийи. Гюрюш сатIиди шикил йивбиинди ккудубкIнийи.
