Ноябрин 20-пи йигъан РФ-дин Президент Владимир Путин Дагъустандин Глава Владимир Васильевдихъди гюрюшмиш гъахьнийи. Дидин гьякьнаан Кремлин асас сайтдиъ мялумат тувна.
Гюрюшдиъ Владимир Васильевди Дагъустандиъ экономикайин ва яшайишдин улупбар ужуб терефнахъинди дигиш шулайиваликан гъапну. «Учухь асас цирклариъ улупбар за шула. Маважибра, ккунибсикьан даршра, яваш-явашди за шула», – гъапну дугъу.
Региондин кIулиъ айири федералин бюджетдиан туву кюмекназ чухсагъул мялум гъапIнийи.
Владимир Васильевди, республикайиъ гособоронзаказ кьатI апIбахъди аьлакьалу вуди, ляхин апIру йишвар цIиб хьпан месэлйир арайиз дуфнайиваликан гъапну. «Заан гьясиллувалиинди ляхин апIру йишвар – мушваъ ляхнар ужуди дар, – къайд гъапIну В.Васильевди. – Учухь хьуб проект уьмриз кечирмиш апIувал яваш гъапIну. Хъа арайиъ айи сабсан месэла – гособорозаказра кьатI гъапIну». Дугъу уьлкейин Президентдикан республикайин гьясиллувалин кархан-йириз чпиз айи вари мумкинвалар ва кьувват ишлетмиш апIуз табшуругъ тувувал ккун гъапIну.
Республикайин кIулиъ айи-рин гафариинди, гъюру йисан Дагъустандин бюджет артухъ хьибди: Федералин бюджетдин кюмекниинди ва «сирникк» ккайи экономика ачмиш апIувалин, коррупцияйихъди женг гъабхувалин натижайиъ бюджетдиъ айи пулин кьадар 130 миллиард манатдиина за апIуз мумкинвал гъабхьну.
В.Васильевди республикайиъ штухъди тямин апIбан, тикилишчивалин ва расвалин ляхнар гъахбан объектариз 1,9 миллиард манатдиинакьан дакьатар жара гъапIуваликанра гъапнийи. «41 райондиъ рас апIбан ляхнар ккудукIну адру объектар, таза алаъну, ккудукIунча. Натижайиъ 500 агъзуртIан артухъ кас штухъди тямин апIбан шартIар къайдайиз гъафну», − къайд гъапIну В.Васильевди.
«УрчIвуб вазлин арайиъ республикайин рякъяриъ 267 кас гъийихну, 1900 касдиз жюрбежюр гъагъишнан зийнар гъахьну. Му кьадар, ич фикриинди, гизаф ву», − мялум гъапIну республикайин Главайи. Дугъу Урусатдин Президентдикан «Кавказ» автомобилар гъягъру рякъ артухъси хатIасуз апIуз ихтияр тувуб ва кюмек ккун гъапIнийи.
В.Васильевди гьацира, ФАС-дин улупбариинди, Дагъустандиъ гьякьимари антимонопольный къанун чIур апIувал 70 процентдиинди цIиб гъабхьиваликанра гъапнийи. БицIи бизнесдин субъектари гьясил гъапIуб гьюкуматди масу гъадабгъувал 46,7 процентдиинди за гъабхьну, дидира бицIи бизнесдин артмиш’вализ тясир гъапIну.
Владимир Путинди чав Дагъустан Республикайин Главайин теклифариз артухъси фикир тувуз гьязур вуйиваликна гъапнийи.
