Ноябрин 26-пи йигъан «Дагъустан» РИА-йин конференцйир гъахру залиъ «Газпром трансгаз Мягьячгъала» ООО-йин генеральный директор Александр Астаниндихъди пресс-конференция кIули гъубшнийи.
Конференция ачмиш апIури, «Газпром трансгаз Мягьячгъалал» ООО-йин кIулиъ айири жикъиди караханайи тамам апIурайи ляхнарикан гъапнийи. Дугъан гафариинди, гьамусяаьтна «Газпром трансгаз Мягьячгъала» ООО Дагъустан Республикайин ва Кафари Кавказдин регионарин агьалйир табиаьтдин газдихъди тямин апIурайи «Газпром» ПАО-йиз дахил шулайи кархана ву. Къайд дапIнайи карханайи гьар йисан 11 миллиард кубический метртIан артухъ газ хътапIура. Гъийин йигъаз карханайиз 12 филиалра, гьадму гьисабнаъди 5 управлениера а.
«Газпром трансгаз Мягьячгъала» ООО-йин тарихдикан улхури, Александр Астанинди къайд гъапIганси, му кархана 1979-пи йисан яратмиш гъапIуб ву. 1980-пи йисан республикайиъ «Моздок – Къазимягьямед» ва «Макат – Кафари Кавказ» газ гъябгъру магистралар, яна аьхю турбйир, ккирчну ва гьадму йисан Избербаш ва Къизилюрт шагьрариъ компрессорин станцйири ляхин апIуз хъюгъну. Хъасин яваш-явашди имбуну станцйирра тикмиш дапIну ккудукIну.
«Гъийин йигъан дагълу районариъ лихурайи касарра кади гьисаб гъапIиш, карханайиъ 1800 касди ляхин апIура. Гьаму касариз яшайишдин терефнаан кюмек апIбан гьякьнаанра ляхин кIули гъабхурача. Мисал вуди гъадабгъиш, ич карханайин гъуллугъчйирин яшайишдиъ алахьурайи читинвалариз учу гьаммишан фикир туврача. Коллективдин йикьрариинди, карханайин гъуллугъчйириз, пенсионерариз уьмрин жюрбежюр гьядисйириъ кюмек апIбан бадали, дуланажагъдин ипотекайин программайира ляхин апIура. Карханайиъ лихурайи касарин бицIидар хьадну лагерариз гьаърача», – гъапнийи дугъу.
Мидланра гъайри, Александр Астанинди туву мялуматариинди, жигьиларихъди вуйи ляхинра ужуди гъябгъюра. Янаки му карханайи, уьмур дигиш апIуз ужудар фикрар айи, ужуб гьевес кайи, чпин рякъбар гучI дарди ачухъ апIру жигьиларра ляхниз гъадагъну, дурарин ляхнин тажруба артмиш апIбан гьякьнаанра ляхин гъабхура.
Конференция аьхирихъди гъюри, Александр Астанинди вари чан гъарашугъар карханайин улубкьурайи юбиле-йихъди тебрик гъапIнийи ва дурариз варидариз декабрин вазлиъ кIули гъябгъру яркьу серенжемдиъ иштирак’вал апIуз дих гъапIнийи.
