Улубкьурайи ЦIийи йис къаршуламиш апIуз варитIан аьхю елка Дербент шагьриъ дивди. Думу ёлка Кафари Кавказдиъ варитIан ягълиб хьибди кIури, гьисаб апIура. Му пешкеш шагьриз ВТБ банкди багъиш апIурайиб ву.

Дербент шагьрин администрацияйин пресс-гъуллугънаан мялум гъапIганси, елка Коломна шагьрин заводдиъ гьязур апIура. Ляхнар аьхирихъна гъюра ва багарихьди елкайи Дербент шагьрин аьхю майдан балгиди. Елкайин ягълишин 40 метр ву. Дидин кIакIниин 2,5 метр али хяд иливиди.

Дербентдиъ майдандиин дивру елка гьязур апIбиин 50-тIан артухъ инсанар лихура. Дурари металлин конструкция, табии дару зазар ва зазарсдар ккуру кIажар, жюрбежюр аквар тувру алатар, ёлка балг-руган китIру уюнжагъар гьязур апIура. ЦIийи йисандин елкайик 235 укIу ва лизи хядари акв тувди. Дурар 60 сантиметрилан 2 метриина аьхюшин алидар хьиди. Хъа китIру уюнжагъар гъизилин, укIу ва арсран рангарихьди балгиди.

Елка аьхю микIарихьанра зарар тувуз даршлуганси мюгькамди гьязур апIура.
Къайд апIуз ккундучузки, сад йислан Дербент шагьриъ дивру елка 20 метринсана ягълиб апIиди, ва думу, дугъриданра, Урусатдиъ варитIан ягълиб хьибди. Гьаму йигъари елкайин конструкцияйин саб пай Дербентдиз хура. Дербент шагьрин ва багахь районарин агьалйирин ва баяр-шубарин юкIварик диди аьхю гьевес капIди кIури, миж кивдихьа.