Наргиз Гюлечова

Ментальный арифметика Дагъустандиъ егинди артмиш шули, саки 7-8 йискьан ву. Мид’ин машгъул вуйи бицIидарин кьадарра йигълан-йигъаз артухъ шула. Ментальный арифметика гъапиган, думу фикриъди ухди-ухди гьисабар гъахувал ву. Эвелиан гьисабар гъахру алат ишлетмиш апIури, бицIириз тIубарихьди гьисабар гъахуз улупуру, хъасин гьисабарин алат гьадабгъну, вари гьяракатар фикриъди гъахуру. Натижайиъ ментальный арифметикайиин машгъул вуйи бицIидарин кIваин уьбхбан зигьимра, ухди фикир апIувалра адабшвуру.

Ментальный арифметикайиан гьар йисан талитарра гъахури шулу. Швнуб-саб ражари Дагъустандиан вуйи командйир Урусатдиъ ва варихалкьарин арайиъ вуйи талитариъ гъалиб гъахьну.

Магьа улихьна йигъарира бицIидариз ментальный арифметика улупурайи «PROGRESS» мектебдин ихь уьлкейин вари регионариъ лихурайи филиалариан вуйи бицIидарин арайиъ урусатдин олимпиада кIули гъубшну. Олимпиадайиъ, фикриъси, тIубариинди гьисаб апIуз дубгъурайи бицIидарра иштирак гъахьну. Му талитнаъ Буйнагъск шагьрин 7-пи нумрайин кьялан мектебдиъ 3-пи классдиъ урхурайи, Табасаран райондин НичIрас гъул’ан вуйи Лейла Аьлигьюсеевара иштирак гъахьну, ва дугъу сабпи йишв гъазанмиш гъапIну.

Лейла му ляхниин машгъул духьну 3 вазтIан даршра, ужудар хъуркьувалар улупурайивализ лигну, дугъан мялим Мар’яна Уьсмановайи шураз олимпиадайиъ иштирак хьуз теклиф гъапIнийи. Ва шуру мялимдин хъугъвал батIул гъапIундар.

Гьацира, къайд апIуб лазим вуки, Лейлайи ужуди дарсар урхурайивализ лигну, дугъан шикил мектебдин гьюрматнан доскайикра кебхна. Гьамусдихъантинара шуру гьамцдар хъуркьувалар гъадагъур кIури, умудлу вуза.