Декабрин 14-ди Санкт-Петербург шагьрин Сибур-арена кIуру спортдин талитар гъахру залиъ ММА жюрейин спортдиан АСА тешкилатди нубатнан 103-пи талитар кIули гъухну. Думу турнириъ пучIу гъагъишнан спортсменарин арайиъ мидиз улихьна чав гъадабгънайи чемпионвалин чIул уьхбан кчIихбаъ ихь ватанагьли Рустам Керимов Бразилияйиан вуйи Франсиско де Лима Мачиелиин гъалиб гъахьну ва чан чемпионвалин чIул гъюбхну.
Рустам Керимов гьич сарихьанра ккагъуз духьну адру, 13:0 рекорд айи Урусатдин машгьур спортсмен ву. АСА тешкилатдин рейтингдиз асас вуди, вари дюн’яйин 20 варитIан кIубан женгчйирин арайиъ ихь Рустам Керимовра а.
Гъийин йигъаз дугъан гъалибваларин сиягьнаъ 5 ражари нокаутдиинди, 2 ражари дугъахъди талитназ удучIвнайидари, дугъак хил кучну, чиб магълуб гъахьивал улупбиинди ва 6 ражари судйирин къарарниинди гъадагъу гъалибвалар а.
Му ражари Р.Керимовдихъди талитназ удучIву Бразилияйиан вуйи спортсмен 15-3-1 рекорд айир вуйи.
Сабпи дакьикьайилан хъюгъну, Рустамди чахъди кчIихурайир шубуб ражари жилиина гатIахну (тейкдаун) ва раунддин аьхириъ заъланди йивури чахъди кчIихуз удучIвнайи Франсиско де Лима технический нокаутдиз гьаъну ва чан гъалибвалар 14-диина за гъапIну.
«Му талитариз узу 3 вазлин арайиъ гьязур гъахьунза. Гьаму вахтна хайлин зегьмет гъизигунза. Талит узу планламиш дапIнайиганси кIули гъубшнийи, анжагъ, гьяйифки, ухди ккудубкIну. Хьуб раунддиъ кчIихуз гьязур духьнайза»,
– кIура ихь спортсменди.
Рустамдин хайлин терефкрари кIурайиганси, дугъу чав кчIихурайи тешкилатдиъ ужудар гьунарар улупна. Сану жара тешкилатдихъди йикьрар йитIуз ккадарна кIури, узу гьерхиган, Рустамди гьамци гъапнийи: «Гьелелиг жара тешкилатдиз гъягъюз планар адариз. АСА-йиъ ужуб гьевес, чемпионвалин чIул гъадабгъуз гьунар кайи фукьан вушра баяр а. Яна дурарихьан узухъди талитназ удучIвуз шлуваликан пуз шулу. ДибикIнайи контрактдиинди, му аьхиримжи талит вуйиз. Узхьан гьамусяаьт UFC-йихъдира контракт бикIуз вая гьаму АСА-йиъ гъузузра шулзухьан. Му меселайин гьякьнаан сабан фукIа пуз ккундарзуз».
Учв Рустам гизаф шаду кас ву. Гьарсаб талитнан кьяляхъ чаз фукьан гъагъиди гъабхьишра, дугъан кIвантIарикк инчI ккади шулу. Мидин гьякьнаанра дугъу мялум гъапIганси, октагондиз гъягъруган чахъанди вуйидарин, иллагьки табасаранлуйирин гьиссар гъяркъиган, думу гизаф рази шулу. Гьаддиз дугъаз кчIихузра рягьятди ву.
Хъана урхай:
Рустам Керимов успешно защитил чемпионский титул
Рустам Керимов стал чемпионом объединенной лиги АСА
Глава Табасаранского района провел встречу с молодежью муниципалитета
