Наргиз Гюлечова
Республикайиъ гъургъу мархьар-селлери, инсанаризси, региондин гъулан мяишатдизра аьхю зарар тувну. Шлин мал-къара, шлин пеъ-шюхъ шту ккаъну гъийихну вая хьади гъушну. ДумутIан савайи, хусуси мяишатаринси, аьхю мяишатаринра, хутIлариъ дурзнайи тумар, багълариъ кивнайи гъелемар шид улубчIвну чIур гъахьну. Региондин гъулан мяшатдин ва ипIру-убхъру сурсатарин министерствойи республикайиз фукьан зарар дубхьнаш аьгъю апIбан оперштаб ачмиш дапIна. Оперштабдиз дахил шулайи пишекрари мяишатариъ дубхьнайи зарар 29-пи мартдихъанмина гъийин йигъазкьан гьисаб апIури а.
Республикайин гъулан мяишатдиз фициб зарар дубхьнаш аьгъю апIуз ва дидин кьадар гьисаб апIбан ляхнарихъди таниш хьуз, Дагъустандиз Урусатдин Россельхозцентрин директорин заместитель Дмитрий Говоров гъафнийи. Думура оперштабдин ляхнариъ иштирак гъахьну. Дугъан регьберваликкди министерствойиъ му гъагъи месэлайин гьякьнаан вуйи заседание кIули гъубшну.
Заседаниейиъ РД-йин гъулан мяишатдин ва ипIру-убхъру сурсатарин министрин сарпи заместитель Шарип Шарипов, Дагъустандиъ айи «Россельхозцентр» ФГБУ-йин филиалин директор Жанна Къазанбиева ва министерствойин вакиларна муниципалитетарин АПК-йин кIулиъ айидар иштирак гъахьнийи. Серенжемдиъ Дмитрий Говоровди къайд гъапIганси, му ляхниъ варитIан асасуб зарар гъабхьи хусуси мяишатари вахтниинди ва лазим вуйи къайдайиинди гьюкуматдин терефнаан тувру кюмекназ, документар гьязур апIуб ву.
«Зарар гъабхьи гьарсар касдиз, туврайи пулин кюмек вахтниинди рубкьруганси, федеральный Россельхозцентр дицдар мяишатариз методикайин кюмек апIуз гьязур ву», – гъапну Дмитрий Говоровди.
Дмитрий Говоровдихъди вуйи заседание дубхьну саб-кьюд йигълан, РФ-дин гъулан мяишатдин мелиорацияйин департаментдин директор Артем Коровинра иштирак духьну, гьаму месэлайихъди аьлакьалу вуйи сабсана заседаниейи республикайин Правительствойин председатель Аьбдулмуслим Аьбдулмуслимовдин регьберваликкдира кIули гъубшнийи. Думу серенжемдиъ Правительствойин председателира зарар гъабхьи мяишатариз пулин кюмек апIбакан гъапнийи.
Аьбдулмуслим Аьбдулмуслимовди чан терефнаан Урусатдин гъулан мяишатдин министерствойиз ва мелиорацияйин департаментдиз гьаммишан Дагъустандиз кюмек тувбаз чухсагъул гъапну.
«Гъи ихь варитIан улихь дийибгънайи асас вазифа зарар гъабхьи мяишатариз кюмек апIуб вуйихь. Дубхьнайи зарар гьисабназ гъадагъну, гьязур апIурайи документар ухди ва лазим вуйи саягъназ духну, гьяракатниинди Урусатдин гъулан мяишатдиз хъадаъну ккунду. Зарарназ удубчIвурайи кьимат гьисаб апIруган, мяишатарин эйсивалин ихтияр туврайи документаризра фикир тувра. Анжагъ гьаддин кьяляхътIан, фициб жюрейиинди кюмек тувруш, къарар адабгъидар.
Му ляхниъ мяишатариз РД-йин гъулан мяишатдин ва ипIру-убхъру сурсатарин министерство, ветеринарияйинна тIумутIчивалин комитетар, Россельхозцентр ва Россельхознадзор кюмекчйир духьну ккунду», – гъапну Аьбдулмуслим Аьбдулмуслимовди.
Серенжемдиъ иштирак гъахьи РД-йин гъулан мяишатдин ва ипIру-убхъру сурстарин министр Шамиль Рамазановди, мяишатариз дубхьнайи зарарнан кьимат фици гьисаб апIураш, ктибтну. Дугъан гафариинди, гьарсаб муниципалитетдик, дубхьнайи зарар гьисаб апIбан бадали, министерствойиан вуйи сар вакил китIну, комиссияйин ахтармишар гъахура. Гьацира, министри къайд гъапIганси, йишвариин гъийиху мал-къара жилариъ ивбан ляхинра гъябгъюра ва гьадму ляхнарин актарра дикIури а.
«Табиаьтдин му завали Дагъустандин гъулан мяишатдиз аьхю зарар тувну. Жа-жаради гьисаб гъапIиш, 700-тIан артухъ аьхю малар, 3 агъзурихьна чарвйир, 60 агъзуртIан артухъ пеъ-шюхъ, 150-рихьна арфарин мяишатар гъийихну. Хъа хутIлар-багъларикан кIуруш, жюрбежюр тумар дурзнайи 6 агъзур гектарин хутIлар, 250 гектар йимишарин ва 1,7 агъзур гектар тIумтIин багълар пуч гъахьну.
Гьамдихъди аьлакьалу вуди пуз ккундузузки, гъийин йигъаз улихь ккимиди вуйи улупбариинди, республикайин гъулан мяишатдиз табиаьтдин завали туву зарарнан кьимат 600 миллионкьан дубхьна. ИкибаштIан, му кьадар хъанара артухъ хьуб мумкин ву. Фицики гьелелиг саспи йишвариъ штар дийигъну ими, гьаддиз душвариъ дубхьнайи зарар гьисаб дапIнадар. Ляхин сабан давам шули ими», – аьлава гъапIну министри.
