2020-пи йисан январин вазлилан башламиш дапIну, «БицIидар айи хизанариз тувру пулин гьякьнаан» Федералин къанун кьувватнаъ убчIвну. Дидин гьякьнаан РД-йин зегьметнан ва яшайишдин артмиш’валин Министерствойин мялуматарин гъуллугъну хабар тувра.
Хизандиъ айи гьарсар касдиз алабхъурайи гъазанждин кьадар яшамиш хьпан бадали лазим вуйи асккан кьадар пултIан кьюб ражари артухъ дарш, думу хизандиъ бабкан гъахьи ясана байвализ гъадагъу сар, ясана артухъ бицIидар аш, дицдар хизанарихьан бицIирин шубуд йис хьайизкьан пулин дакьатар гъадагъуз шулу. Дагъустандиъ 2020-пи йисан МРОТ 1230 манатдиз барабар ву.
БицIир бабкан гъахьиган, дугъан сад йис тамам хьайиз пул тувуз хъюгъру, хъа бицIирин абйир-бабари дугъан 2 йис тамам хьайиз, хъасин – шубуд йис тамам хьайиз аьрза дибикIну тувну ккунду. Аьрзайихъди лазим вуйи документарин копйирра тувну ккунду. Эгер бицIирин сад йисна гьацI тамам дубхьну, гъубшу йисан туврайи пул хътабтIнуш, лазим вуйи документариз ва аьрзайиз асас духьну, 2020-пи йисан январихъан мина думу пособие цIийи алапIуз шулу.
БицIир бабкан хьувалихъди ясана бицIир байвализ гъадагъувалихъди аьлакьалу вуди тяйин дапIнайи ва гьар вазлиъ тувру пул бицIирин сад йис тамам хьайизкьан туври гъубзру, хъасин документар цIийи алаувал лазим ву.
