ЕГЭ тувуз хъюгъхъан мина, табасаран баяр-шубариз Урусатдин фунуб вушра вуздик урхуз кучIвбан мумкинвал гъабхьну. Гъи хайлин ихь ватанагьлийири Урусатдин жюрбежюр регионариъ аьгъювалар гъадагъура ва урхбаъ заан натижйир улупура.
Гьадрарикан сар Табасаран райондин Къужник гъулан агьали Мурад ТIаибов ву. Дугъу Тамбов областдин Г.Р. Державиндин ччвурнахъ хъайи Тамбовдин гьюкуматдин университетдиъ 6-пи курснаъ духтирвалин кесп гъадабгъура.
Мурад кьюд йисан хъади-хъади Урусатдин Президентдин стипендияйиз лайикьлу гъахьну. Дугъхьан, уву фици му хъуркьувалихьна гъафунва, кIури узу гьерхиган, гьамциб жаваб тувнийзуз: «Ич университетдин ректоратдин гъуллугъчйири 2018-пи йисан узу Президентдин стипендияйиз лайикьлу духьнайиваликан мялум гъапIнийи. 2019-пи йисанра му стипендияйиз лайикьлу шул кIури, фикир дайиз. Хайлиндари, конкурсдиъ кьюбпи ражарира экспертарин комиссияйи иштирак хьуз ихтияр тувудар, кIури гъахьнийи. Хъа узу, жвуван мумкинвалар аьгъю апIбан бадали, аьрзйир кьабул апIуз кьюд йигъ ккимиди кьюбпи ражарира документар хътаънийза.
Илимдин советдиъ йиз документариз дилигну, разивал тувну, ва дурар РФ-дин заан образованиейинна илимдин Министерствойиз хътаъну. Душваъра экспертарин комиссияйи гьацI йисандин арайиъ йиз аьрза тартиб апIури, хъадаънайи документар ахтармиш апIури гъахьну.
Магьа гьаму улихьнаси (ич сюгьбат 30-пи декабриъ кIули гъубшнийич) йишвну сяаьт сабдин гьацIаъ йиз телефондиз мялумат гъафнийи. Дидиъ дибикIнайи: «Мурад Мягьямедович, сарун итни йигъ ву, яна лихру гьяфта ккебгъна. Мубарак апIурача. Уву 2019-2020-пи йисариз вуйи РФ-дин Правительствойинна Президентдин стипендияйиз лайикьлу гъахьунва».
Му стипендия узуз, ужуди урхурайивализ, илимдин цирклиъ ляхин апIбаз, Урусатдин дережайин конференцйириъ иштирак ва олимпиадйириъ гъалиб хьпаз, ихь гьюкуматдин ва харижи уьлкйирин журналариъ илимдин макьалйир чап апIбаз лигну, туврайиб ву.
Хайлиндари узхьан, фици гьамцдар ляхнар удукьураш, гьерхри шулу. Гъийин йигъаз му узу урхбаъ зигурайи зегьметнан натижа ву. Гьарсаб нубатнан хъуркьували узук хъанара улихьна гъягъюз гьевес капIра. Хъа РФ-дин Правительствойинна Президентдин стипендияйин сагьиб хьували узуз ихь уьлкейин заан аьгъювалар тувру фунуб университетдин ординатурайиъра фунуб-вушра пише гъадабгъуз аьлава мумкинвал тувра», – гъапнийи бажаранлу жигьили.
Му стипендия ктарди, Мурад сабсана стипендияйин сагьиб духьна. 2019-пи йисан 20-пи декабриъ Тамбов областдин администрацияйиъ 2019-2020-пи йисариз вуйи областдин думайин гьар йисандин грантарин гъалибчйириз ва областдин губернаторин ччвурнахъан вуйи стипендйирин сагьибариз шагьадатнамйир тувбаз бахш дапIнайи яркьу серенжем кIули гъубшну. Му серенжемдиъ Мурад ТIаибовдизра Тамбов областдин улихьдин губернатор Э.Х. Икавитцайин ччвурнахъан медицинайин цирклиан вуйи стипендияйиз лайикьлу хьувалин шагьадатнама тувну. Мидланра гъайри, областдин администрацияйиз ихь кIубан балин абйир-бабаризра дих гъапIнийи. Тамбов областдин думайин председателин ччвурнахъан вице-губернатори Мягьямед ва Аминат ТIаибовариз намуслуди бай тербияламиш апIбаз, дугъан яратмишвалихьна аьшкь ва мумкинвалар артмиш апIбаз лигну, чухсагъул мялум апIбан кагъазра тувну. Хъа Мурадлиз Тамбов областдин цIийи губернатор В.А. Никитиндихьан чухсагъул мялум апIбан кагъаз тувну.
Мурадли узуз, пишейиан артухъси аьгъювалар гъадагъбан бадали, чав, дарсарихьан азад вахтна шагьрин больницайиъ лихурайиваликанра ктибтнийи. «Йишвандин вахтна больницайиъ нубатчивал апIузра гъягъюраза. Гъийин йигъаз сад йисанди тажрубара айиз», – давам гъапIнийи дугъу чан ихтилат.
«Му ляхин ктарди, «Волонтерар – медицинайин гъуллугъчйир» Урусатдин жямяаьтлугъ гьяракатнан Тамбов областдин региондин отделениейин волонтерра вуза. Мушваъ ляхин апIури, 450 сяаьттIан артухъ вуйиз. Гьацира спортдин, ясана гизаф инсанар уч шлу жара жюрбежюр серенжемар кIули гъягъруган, медицинайин кюмек апIури, дурариъра иштираквал апIураза. Хъа азад вахтна спортдиинра машгъул шулза», – аьлава гъапIнийи Мурадли.
Гележегдиз вуйи планарикан улхури, Мурад ТIаибовди заан хъуркьувалариинди университет ккудубкIну, «уьру» диплом айи ужур пишекар хьуз ккуниваликан ктибтнийи. Университетдин кьяляхъ дугъу кIван дамарарин хирургияйин цирклиан пишекар хьпан бадали ординатурайик урхуз кучIвуз планламиш апIура.
Ихь жигьилин ужудар планар уьмриъ кечирмиш ишри. Дугъкан ужур духтир шул кIури ухьура умуд кивдихьа.
