Улубкьнайи 2020-пи йисан Хив райондиъ жюрбежюр юбилеяр къаршуламиш апIбан мяракйир хьиди. Саб гъапиб, 1935-пи йисан Хив район арайиз гъафихъан мина цци 23-пи мартдиъ дидин 85 йис тамам шула. Гьелбетда, му важиблу гьядиса заан дережайиъди къайд апIбанди ву.
Кьюб гъапиб, вари уьлкейихъди сабси Хив райондиъра Ватандин Аьхю дяви ккудубкIну Гъалибвалин 75 йис тамам хьувал аьхю аьшкьниинди къаршуламиш апIиди. Му гъалибвалик Хив райондин агъзрариинди агьалйиринра пай ка.
Шубуб гъапиб, Хив райондин администрацияйин, культурайин хулариъ, бицIидарин багъариъ ва мектебариъ литературайин цирклиан вуйи юбилеяриз бахш дапIнайи серенжемар гъахиди.
Амма, гьяйифки, дурарикан шубуб чпин асас тахсиркрарин иштирак’вал адарди кIули гъягъиди. Улубкьу йисан июндин вазлиъ Ибрагьим Шагьмардановдин ва Манаф Шамхаловдин 105 йис, хъа 23-пи февралиъ – МутIалиб Митаровдин 100 йис тамам хьиди. ИкибаштIан, халис шаирар йихруб дар. Ихь арайиан гъушнушра, чпин устадвалин, чIалнан сазандарвалин ва аьяндарвалин лишнариинди, хумарвализ урхру такабур эсерари, китабари, халкь, чIал, культура, фольклорин тарих бадали алдагъу ликари дурар аьсрариинди марцциди ихь кIваъ ва фикриъ гъитру. Мидланра савайи, гъюрайи наслариз мектебдиъ гъахру ачухъ дарсариъ Ватандин Аьхю дявдиъ гюллдихь мухур гьиву М. Митаровдин ва И. Шагьмардановдин яртамишарикан, дурарин уьмрихьна вуйи лигбакан ва табасаран литература артмиш апIбак дурари киву лайикьлу пайнакан яркьуди кидибтну ккунду. Ухь’ин жан илимбукьан гагьди, гьам аьхюдарра, гьам бицIидарра дурариз икрам апIуз, фикриъ гъитуз буржлу вухьа.
Цци гьацира кечирмиш шулайи деврин бажаранлу шаир, чIалнан устад, табасаран ва имбу дагъустан халкьарин бицIидарин дуст Гюлбика Уьмаровайин бабкан духьну 10-пи июндиъ 60 йис тамам шула. Дугъу багъри табасаран литература, мяналу лирикайин ва бицIидариз дидикIнайи шиърарииндиси, жара халкьарин литературйириан варитIан ужударсдар эсерар таржума апIури, цIийи темйириинди ва жанрариинди девлетлу апIура.
Хив райондиъ му мяракйир баркаллувалиинди, аьхю аьшкьниинди ва иштагьниинди кIули гъахрувалиин узу умудлу вуза. Гъит, ухьуз мицисдар серенжемар артухъ ишри!
