18-19-пи январиъ Мягьячгъалайиъ хил ккипбан (армрестлинг) Дагъустандин чемпионат кIули гъубшну. Думу талитариъ ихь ватанагьли Аким Аьбдуллаев 90 кг гъагъ айи спорт-сменарин арайиъ республикайин чемпион гъахьну. Му чемпионат, армспортдиан Урусатдин чемпионатдиъ иштирак’вал апIру спортсменар гъядягъюз кIури, тешкил дапIнайиб вуйи.

Март вазлиъ Аким Пермь шагьриъ кIули гъябгъру Урусатдин чемпионатдиъ иштирак хьиди.

Аким Аьбдуллаев – ЦIурутIил гъулан агьали ву ва гьамусяаьт Хючна гъулаъ «Олимп» спортклубдин директорди лихура. Армрестлингдиан спортдин устад ву.

Дугъу Табасаран райондин, Дагъустан Республикайин, Урусатдин, дюн’яйин дережайиъди кIули гъушу хайлин талитариъ сабпи ва пешкешнан йишвар гъадагъну. Гьаци, 2010-пи йисан армрестлингдиан Мягьячгъала шагьриъ жиларин арайиъ, 2012-пи йисан Мягьячгъала шагьрин сабпи йишв бадали 1992-1994-пи йисари бабкан гъахьи жигьиларин арайиъ кIули гъуху талитариъ, 2013-пи йисан 90 кг гъагъ айи спортсменарин арайиъ Урусатдин чемпионатдиъ, 2014-пи йисан Белгород шагьриъ армспортдиан кIули гъубшу Урусатдин студентвалин спортдин союздин чемпионатдиъ, Мягьячгъала шагьрин кубок бадали вуйи талитариъ ва «Калмыкияйин дуствалин кубок» ччвур тувнайи вари Урусатдин ачухъ вуйи Х турнириъ, 2018-пи йисан жиларин арайиъ кIули гъубшу Дагъустандин чемпионатдиъ 90 кг гъагъ айи спортсменарин арайиъ – 1-пи йишвар, 2016-пи йисан армрестлингдиан «Калмыкияйин дуствалин кубок» ХII турнириъ 100 кг гъагъ айи спортсменарин арайиъ – 2-пи йишв, 2013-пи йисан Польшайиъ кIули гъубшу дюн’яйин чемпионатдиъ – 4-пи йишв гъазанмиш гъапIну.