Ккудубшу йисан удубчIву «Табасарандин нурар» газатдин 20-пи нумрайиъ чап дапIнайи «Хайирлуди хъапIу уьмур» макьалайин эвелиъ, гъи Хюрикк гъулаъ миржцIур ва миржцIуртIан артухъ яшар духьнайи къанна хьур агьалйир яшамиш шула кIури, хабар тувнийза.

 

Дидхъан мина ургуб ваз кечирмиш гъахьну ва думу яшлу агьалйирин жергейиан швнур-сар кас аьхиратдиз гъушну. Дурарикан гьарсар чпин уьмрикан бикIуз лайикьлу касар вуйи: аьхю уьмур ккадапIдар, чпин уьмриъ гизаф гьядисйирин шагьидар гъахьидар ва ужубна харжиб гъябкъдар, тамам апIурайи ляхнариъ тафавутлу гъахьидар.

Йиз гъийин макьалайин игит гизаф йисари мялимвал гъапIу, чан уьмрин аьхюбсиб пай аргъаж шулайи наслариз аьгъювалар ва тербия тувбаз бахш гъапIу кас, Хюрикк гъулан агьали, мялимарин мялим Гьяжикерим Межидов ву. Думу 1937-пи йисан Табасаран райондин Хюрикк гъулаъ мялимдин хизандиъ бабкан гъахьну. «Йиз адаш кIваинди имдариз, – кIура дугъу, – фицики, ич рягьматлу Гьясратяли эмдин гафариинди, фициб-вуш гъагъи уьзур ачмиш дубхьну, думу лап жигьилди имиди кечмиш гъахьну.

Адаш ягъли ва уткан жан хъайи жигьил вуди гъахьну. Мектебдиъ дугъу заан аьгъю-валариз урхуйи. Мектеб ккудубкIган, думу Дербентдиз сад йисандин мялимвалин курсариз гьаънийи. Курсар дурхну гъафи жигьил мялим Табасаран райондин Гурхун гъулаъ лихуз хъюгънийи. 1936-пи йисан дугъаз Хюрикк гъул`ан Ханум Гьюсейнова кIуру риш швушвди хуру, хъа 1937-пи йисан узу бабкан гъахьнийи. 1939-пи йисан кечмиш шлуган, адашдин яш 20 йискьан дубхьнадайи, вазарилан йиз дадайи сарсана бай гъахнийи. Дугъ`ин йиз адашин ччвур – Аьбдулмежид – иливнийи, амма думура бицIиди имиди кечмиш шулу. Узу сифте ич Мягьяма абайина Гюрсум бабу гъюрхну, хъа дада, жигьил дишагьли, ТIаттил гъулаз швуваз тувру, душваъра дугъаз сар бай шулу – Аьбдулбасир. Аьхю абара, бабра кечмиш гъахьиган, узу ич Мягьямед эмди чан хизандиз гъадагънийи».

Ургуд йис гъабхьиган, Гьяжикерим Межидов (1944-пи йисан) мектебдиз гъягъюру. Гъулаъ 7-пи класс ужудар аьгъювалариинди ккудубкIу жигьили 8-пи классдиъ урхувал Хючна гъулан кьялан мектебдиъ давам апIуру. «Хючна мектебдиъ урхурайиган, учу интернатдикра кайча, думуган узухъди ихь гъул`ан вуйи Муслим Аьлиевра, Зейфудин Исмяиловра хъайи, – кIваин гъапIнийи агъсакъли. – Мектебдиъ урхури имиди швушв гъахну кIури, Муслим мектебдиан утIуккнийи, хъа швушв хуваликан хабар тувундарчва кIури, узуна Зейфудин интернатдикан ктIуккнийи. Му гьякьикьатди учу дахъру йишвахъра, суткайиъ саб ражну тувру 700 грамм сурслин уьлихъра мягьрум гъапIнийи. Думу вахтар лап читиндар вуйи, я алабхьруб, я ипIруб гьубкIну адарди, инсанар гизаф касибди яшамиш шулайи. Интернатдикан ктIуккиган, гвачIнинган Хючназ дарсариз гъягъюри, лисхъан гъулаз хътакури, урхуб алабхъунчуз. Гьар йигъан ярхи рякъ ккадапIруган, ликариин алахьру шаламар ухди чIяргъюйи ва дурарик кми-кмиди пинйир кивуб алабхъуйи».

Гьяжикерим Межидовди Хючна гъулаъ кьялан образование гъадабгъуру, хъа 1955-пи йисан Дербент шагьриъ педучилище ккудубкIуру. Гьадму йисан дугъу, Хюрккарин ургуд йисандин мектебдиъ ккергъбан классариъ мялимди лихури, чан зегьметнан рякъ ккебгънийи. 1956-1959-пи йисари дугъу Литвайин Каунас шагьриъ СССР-ин Яракьлу Кьувватарин жергйириъ чан ватандаш`валин буржи заан намуслувалиинди тамам апIуру.

Армияйиан гъулаз гъафи Гьяжикерим Межидов Пилгъарин миржид йисандин мектебдиз гьаъру. Душваъ сад йисан дилихну, думу 1960-пи йисан Хюрккарин миржид йисандин мектебдиз гъюру ва ккергъбан классарин мялимди лихуз хъюгъру. 1964-1969-пи йисан Гьяжикерим мялимди Дагъустандин педагогвалин институтдин математикайинна физикайин факультетдиъ заочно къайдайиинди урхуру ва гьаддихъан мина пенсияйиз удучIвайизкьан Хюрккарин кьялан мектебдиъ математикайин, физикайин дарсарра киври, мектебдин директорин заместителин, тербияйин ляхнариз лигру ва классдин гъирагъдиъ гъахру серенжемарин тешкилатчивалин вазифйирра тамам апIури гъахьну.

Гьяжикерим Межидовдихъди узура гизаф йисари гъилихунза. Думу намуслу, хъугъ`вал али, чан пише дериндиан аьгъю, урхурайидариз заан аьгъювалар тувру, гъарашугъариз нумуна вуйи халис мялим вуйи. Классдин гъирагъдиъ гъахру серенжемар тешкил апIбан къайдйириан дугъу вари мялимариз кьиматлу насигьятар тувуйи ва тербияйин ляхин заан дережайиз адапIбан рякъяр улупуйи. Мектебдин тешкилатчивалин вазифйир тамам апIури, гьадму саб вахтна партияйин райкомдин пропагандистра вуди гъахьну. 1979-пи йисан думу Табасаран райондин ужударсдар мялимарин арайиан Дагъустандин мялимарин съезддиз делегатди гьаънийи.

Жигьилариз заан аьгъювалар ва тербия тувбаз, райондин уьмриъ жанлуди иштирак хьпаз лигну, Гьяжикерим Межидовдиз гизаф кьадар пешкешар тувну: пропагандайин ляхниъ гъазанмиш гъапIу хъуркьувалариз лигну, РК КПСС-дин гьюрматнан грамота, мектебдин гъирагъдиъ гъахру серенжемар заан дережайиъ тешкил апIбаз лигну, Гьюрматнан Лениндин грамота, урхбан ляхнарин Министерствойин коллегияйин медаль, «Зегьметнан ветеран» медаль ва хайлин жарадар.

Гьяжикерим Межидов, ужур инсанси, бажаранлу мялимси, гъулан жямяаьтдин арайиъ машгьур тешкилатчисира мялум ву. Думу чан багъри гъулан жямяаьтдин гьарсаб йигъинжагъдиъ жанлуди иштирак шулу. ДумутIанра савайи, дугъу, ккудубшу аьсрин 80-90-пи йисари транзисторар айи телевизорар рас апIури, дурариз антеннйир диври, албагури, агьалйириз гизаф кюмекар тувуйи.

Хъа Гьяжикерим мялимдин уьмрин юлдаш Лейли бажи гьарган чан «аьхюрин» гъайгъушнаъ айи дишагьли ву. Дурари сатIиди ярхи ва мяналу уьмур хъапIну. Лейли бажийи вари уьмриъ табасаран дишагьлийирин асас пише – халачачивал апIури гъахьну, хъа гъи лайикьлу рягьятвалиъ а. Чпин албагу уьмриъ дурари йирхьур велед (юкьур байна кьюр риш) аьхю ва тербияламиш гъапIну, баяриз заан образование тувну, вари веледарин хизанар ккергъну. Гьамус дурарикан шубур гъулаъ, шубурсана чпин кюлфетарихъди Ставрополь шагьриъ яшамиш шула.

Гьяжикерим ва Лейли Межидовар 21 худлин ва 18 гудлин аьхю абана баб ву. Гъи дурар чпин бицIинур балин, Аьбдулманафдин, хизандихъди яшамиш шула. Ихь гьюрматлу яшлуйириз мюгькам сагъ`вал, хизандин манивал ва хушбахтлу уьмур хьуб ккун апIурхьа.

 

Шиклиъ: Гьяжикерим Межидов чан уьмрин юлдаш Лейлийихъди.