Аьхиримжи вахтари «жигьилариз ляхин адар, хизандин дуланажагъ тямин апIру булагъар вуйи, совет вахтари ляхник кайи халачйирин цехар, заводар, фабрикйир хъяркьна, совхозар гъадаргъну» кIуру гафар кми-кмиди текрар апIури шулхьа.Хъа саб терефнаан гъилигиган, гъийин жигьилариз зегьмет зигуз даккниваликан, саб ляхнихъ хъюгъну, дурарихьан гьадму кIулиз адабгъуз даршлуваликан гьархну ккундар. Яшлу инсанари гъийин замана яшамиш хьпан, гъазанмиш апIбан, алабхьрубдин, ипIрубдин гьякьнаан гизаф рягьятвалар айи замана вуйиваликан кIури шулу.
Гъубшу гьяфтайиъ, Дер-бент шагьрин агьалйирин ляхнихъди тяминвал фициб вуш, му цирклиъ алахьурайи читин месэлйир фицдар вуш аьгъю апIбан бадали, шагьрин бикарвалин идарайиъ ляхин апIурайи инспектор Валида Аьдиловайихъди сюгьбат гъубхнийза.
Дугъу мялум гъапIганси, гьамусяаьт ихь республикайин муниципалин районариъ ва шагьрариъ бикарар гьисабназ гъадагъру 52 центр а. Ляхин абгурайи касар думу центрариз илтIикIура. Къайд дапIну ккундуки, бикарарин цент-риз агьалйир илтIикIувалин кьадар йислан-йисаз артухъ шула, гьаз гъапиш центри агьалйир ляхнихъди тямин апIувалин месэла ужуди кIули гъабхура. Мисалназ, Валида Аьдиловайин гафариинди, 2019-пи йисан Дербент шагьриъ бикарар гьисабназ гъадагъру центриз ляхин абгури илтIикIу агьалйир ляхнихъди тямин апIувал дидин улихьна вуйи йисахъди тевиш, ляхнихъди тямин гъапIу касарин кьадар 1,8 ражари за гъабхьну, яна чпихьна илтIикIу агьалйирин 70-80 процент дурари ляхнихъди тямин гъапIну.
«Ляхин абгурайидарин арайиъ асас йишв жигьилари бисура. Ккудубшу 2019-пи йисан центриз ляхин абгури 25-29 йисан ва 30-49 йисан яшнаъ айи 4524 кас илтIикIну, дурарикан бикарарди 2664 кас гьисаб гъапIну. Цци 1-пи январихъан 900 кас бикарарди гьисабназ гъадагънача. Сач учухьна илтIикIу агьалйирикан гьаммишандин ляхнихъди 915 кас, хъа вахтназ вуйи ляхнихъди – 1365 кас, гьадму гьисабнаан 1055 кас жигьилар, тямин гъапIунча.
ДумутIанра савайи, Дер-бент, Дагъ. Огни шагьрариъ ва Дербент райондин гъулариъ айи агьалйир ляхнихъди тямин апIру центрари республикайин бикарариз Урусатдин жара регионаризра гъазанмиш апIуз гъягъюз кюмек тувра», – къайд гъапIнийи Валида Аьлисултановнайи.
Сюгьбатнаъ дугъу мялум гъапIганси, Дагъустандиан Урусатдин жара регионариз лихуз гъушдар аьхюну пайси тикилишчивалин ва гъулан мяишатдин ляхнариин машгъул шула. Гизафси дурар Москва ва Санкт-Петербург шагьрариъ, Московский, Ростовский, Астраханский, Саратовский, Тверской областариъ ва Ставропольский крайиъ лихура.
Пишекрарин гьисабариинди, республикайиъ бикарвалин гьисабнаъ дийигъурайи бикарарин кьадар аьхиримжи йисари цIиб хьуз хъюбгъна.
