1-2-пи февралиъ Мягьячгъалайиъ Е. Исимбаевайин ччвурнахъ хъайи стадиондин волейбол уйнамиш апIру Центриъ Дагъустан Республикайин 2005-пи йисан бабкан гъахьи ва думутIан бицIи баярин арайиъ волейболиан сабпи йишв бадали финалин талитар кIули гъушнийи.

 

Талитариъ Табасаран райондин волейбол уйнамиш апIру десте 1-пи йишван сагьиб гъабхьну, 2-пи йишв – ЦIумада райондин ва 3-пи йишв – Къизилюрт шагьрин дестйири гъадагъну.

 

Гъалиб гъахьи командйириз кубокар, медалар ва тялукь дережайин дипломар тувну.

КIваина хурача, 2018-2019-пи йисари Табасаран райондин волейболистар швнуб-саб ражари республикайин чемпионар гъахьнийи, гьацира дурари уьмуми образованиейин командйирин арайиъ кIули гъубшу вари Урусатдин «Арсран туп» талитариъ 2-пи йишв гъибиснийи.