Цци февралин 6-диъ Табасаран райондин администрацияйин заседанйир гъахру залиъ Табасаран райондин глава Мягьямед Къурбанов райондин жямяаьтлугъ тешкилатарин вакиларихъди гюрюшмиш гъахьну.
Серенжем ачмиш апIури, райондин главайи гьамцдар гюрюшари агьалйирин теклифарихъ ва фикрарихъ хъпехъуз, райондин артмиш’валин гьякьнаан гьял дарапIу хайлин месэлйир гьял апIуз мумкинвал тувруваликан гъапну.
Уч духьнайидари РФ-дин Президент Владимир Путиндин РФ-дин Федералин Собраниейихьна вуйи Послание гьял гъапIнийи. Райондин депутатарин Собраниейин председатель Аьлимягьямед Къазиевди Президентдин Посланиейиъ асас фикир тувнайи месэлйирикан ктибтну. Мисалназ, дадавалин капиталикан, класс гъабхбаз мялимариз 5 агъзур манат тувбанди вуйиваликан ва социалинна экономикайин хайлин жара месэлйирикан.
Аь.Къазиевди гьацира сач Дагъустан Республикайин Глава Владимир Васильев Табасаран райондиз гъафиган, дугъу мушваъ Дагъустандин ЮТО-йин яшлуйирин советарин вакиларихъди гъубху гюрюш, душваъ республикайин Главайи саб жерге министерствйириз туву табшуругъар кIваин гъапIнийи.
Хъасин Мягьямед Къурбановди 2019-пи йисан райондиъ гъуху ляхнарикан ктибтнийи, гьадму гьисабнаан рякъяр, мектебар, бицIидарин багъар рас апIбакан, спортдин дараматар, ФАП-ар тикмиш ва рас апIбакан, шид зигбакан гъапнийи. Гьацира дугъу гюрюшдин иштиракчйир улубкьнайи йисан тамам апIбанди вуйи ляхнарихъди таниш гъапIну.
Табасаран райондин яшлуйирин Советдин членари ва жара жямяаьтлугъ тешкилатарин вакилари райондин главайин сач гъапIу ляхниз заан кьимат тувну.Чпин терефнаан дурари райондиъ вари жиларин инвентаризация апIбан, Хючна гъулазди удручIвди, дидин гъирагъдихъан тина гъябгъру машинарин рякъ тикмиш апIбан, Аьхю Гъалибвалин 75 йис хьувал заан дережайиъди къайд апIбан ва жара теклифар тувнийи.
Гюрюшдин натижйир йивури, райондин главайи уч духьнайидариз чухсагъул мялум гъапIнийи, учв ужудар теклифарихъ хъпехъуз гьарган гьязурди айиваликан гъапнийи, хъа райондин халкьдин яшайиш ужу алапIру месэлйир гьял апIбан бадали, аьлакьйир уьрхювал, сар-сарин гъавриъ ахъувал ва варидарин кьувватар сатIи апIувал лазим вуйиваликан къайд гъапIнийи. Аьхириъ саб хайлин вахтари Табасаран райондин райисполкомдиъ гъилиху Мустафа Амирхановдиз Хизри Шихсяидовдин ччвурнахъан вуйи сяаьт пешкешди тувну.
