Улихьна йигъари Мягьячгъалайиъ дуствалин Хулаъ Урусатдин Федерацияйин ва Дагъустан Республикайин лайикьлу духтир Мирзамягьямед Мягьмедовдиз «Дагъустандин Халкьдин игит» орден тувну. Орден, Дагъустандин гизаф миллетарикан ибарат вуйи халкьдин улихь лишанлу хьувализ ва республикайиъ агьалйирин сагъламвал уьбхбан артмиш’валик ла- йикьлу пай кивбаз лигну, тувуб ву.
1970-пи йисхъан мина Табасаран райондин ЦБ-йин кIулин духтирди лихури, Мирзамягьямед Мягьямедовди 48 йисандин арайиъ аьзарлуйирихьна вуйи чан дикъатлувал, пишейиин юкIв аливал, мюгькам жавабдарвал улупну. Дугъу гизаф жигьил духтрариз пишейихьна рякъ улупну, намуслувалиинди зегьмет гъизигну.
Дагъустандин Халкьдин игитрин гъизилин хяд туври, генерал-полковник Мягьямед Танкаевдин ччвурнахъ хъайи, жигьилариз ватанпервервалин тербия тувбан фонднан председатель Гьясангьюсейн Аьбдулжелиловди, М.Мягьямедовдиз мюгькам сагъ’вал, саламатвал ккун гъапIнийи. Серенжемдиз уч духьнайи жара касарира чпин улхбариъ райондин агьалйирин сагъламвал уьбхбан циркил артмиш апIбак М.Мягьямедовди киву лайикьлу пайнакан, дугъан инсанвалин дережайикан, тешкиллувалин мумкинваларикан гъапнийи.
Орден тувбан кьяляхъ М.Мягьямедовди чан ляхниз заан кьимат тувбаз варидариз чухсагъул мялум гъапIнийи. Дугъу къайд гъапIганси, му хъуркьуваларик, Табасаран ЦРБ-йин коллективдин, райондин кIулиъ айидарин, республикайин сагъламвал уьбхбан министерствойин кIулиъ айидарин аьхю пай ка.
«Дагъустандин Халкьдин игит» орден республикайин жямяаьтлугъдин варитIан заан пешкеш ву. Гъийин йигъаз думу орден 18 касдиз тувна. Дурарин арайиъ Дагъустандин муфтий Аьгьмад Аьбдуллаев, сенатор Сулейман Керимов, генерал-майор Уьмар Муртазялиев, UFC-йин чемпион Гьябиб Нурмягьямедов ва жарадар а.
