6-пи февралиъ Табасаран райондин жигьиларин центрин тешкиллувалиинди райондин культурайин хулаъ Мягьячгъала шагьриан дуфнайи Дагъустандин гьюкуматдин медицинайин университетдин сагъламвалин факультетдин 4-пи курснаъ урхурайи студентар Амина Аьлиева, Заира Умалатова ва Къурбан Гьяжимягьямедов Табасаран райондин мектебариъ урхурайи жигьиларихъди гюрюшмиш гъахьну.

 

 

Мярака ачмиш апIури, Табасаран райондин жигьиларин центрин директор Рамис Рамазановди серенжем студентарин теклифниинди гъабхурайиб вуйиваликан ктибтнийи. Думу сач Табасаран райондин глава Мягьямед Къурбановди Мягьячгъалайиъ урхурайи табасаран студентарихъди гъубху форумдин теклифар кIулиз адагъури, тешкил дапIнайиб вуйи.

Гюрюшдиз Табасаран райондин мектебариъ айи 100 кас жигьил волонтёрар дуфнайи. ДГМУ-йин студентка Заира Умалатовайи дурариз «Волонтёрар-медикар» кIуру Урусатдин гьяракатнан гьякьнаан яркьу мялумат тувнийи ва медицинайихъ юкIв хъайидариз му гьяракатнан жергйириз дих гъапIнийи.

Амина Аьлиевайи ва Къурбан Гьяжимягьямедовди волонтёрар-медикарин дестйир мектебариъра арццну ккуниваликан гъапнийи.

Мектебдиъ урхурайидариз студентари сифте манекендиинди, хъасин видеоролик хъипну, кетIерцнайидариз медицинайин сабпи кюмек фици дапIну ккундуш улупнийи. Амрихъан душнайидариз, фалиж кайидариз, ригъдин нурарикк гуж гъабхьидариз, цIа кубкIну гъургдариз, аьхълушну гъициркъдариз фициб кюмек тувруш, зийниан гъябгъюрайи ифи фици дебккруш ва жара уьмриъ чарасуз лазим шлу дюшюшарикан ктибтнийи.

Хъасин ДГМУ-йин студентари уч духьнайидарин суалариз жавабар тувнийи.