Зубайдат Шябанова

Майдин 3-пи йигъан Табасаран райондиъ Хючна гъулаъ Кьалухъ Мирзайин ччвурнахъ хъайи спортдин дараматдиъ юкьяр дисбаан Ватандин Аьхю дявдин гъалибвалин 81 йис хьпаз ва Урусатдин халкьарин сабвалин йисаз бахш дапIнайи талитар кIули гъушну.

 

Талитариъ Дагъустандин кьибла районариан ва шагьрариан 220-тIан артухъ бицIидар иштирак гъахьну. Талитар гъагънан 18 категорияйиъ кIули гъушнийи. Табасаран райондин гъулариан вуйи спортсменарилан гъайри, кчIихбариъ Дербент шагьрин, Хив райондин, Мамедгъала поселокдин ва КIежюх гъулан командйир иштирак гъахьну.
Талитар Табасаран райондин администрацияйин иштираквал ади, райондин бицIидаринна живанарин 4-пи нумрайин спортдин мектебди тешкил гъапIнийи. Спонсорвалин кюмек «Гурик» алверчивалин хулу тувну.

КчIихбариъ 72 спортсменди приздин йишвар гъазанмиш гъапIну. Уьмуми гьисабнаан сабпи йишв 16 гъизилин медалар гъазанмиш апIбан натижайиъ, Табасаран райондин командайи гъадабгъну. Кьюбпи йишван сагьибар Дербент шагьрин команда гъабхьну. Думу командайин спортсменари гъизилин кьюб медаль гъадагъну. Шубубпи йишв’ина Мамедгъала поселокдин команда удубчIвну. Вари гъалибчйир ва призерар чемпионвалин чIулариинди, медаларинди ва тялукь грамотйириинди лишанлу гъапIну.

Табасаран райондин шубур спортсмендиз – Ярса гъул’ан вуйи Сагьид Гусеевдиз, Хючна гъул’ан вуйи Эседулла Мягьямадовдиз ва ГьепIил гъул’ан вуйи Руслан Аьбдурягьимовдиз – ужуб техника, гъалибвалихьна аьшкь ва маракьлу кчIихбар улупбаз лигну, пулин сертификатар тувну.