Февралин 26-пи йигъан «Саб вуйи Урусат» Партияйин Председатель Дмитрий Медведевдин региондиъ айи жямяаьтлугъ кьабул апIру хулаъ РД-йин Халкьдин Собраниейин къанунчивалин, къанун тамам, гьюкумат тикмиш апIбан ва ерли самоуправлениейин Комитетдин председатель Алавудин Мирзабалаевди жюрбежюр месэлйирин гьякьнаан агьалйир кьабул гъапIну. Депутатдихъди вуйи гюрюшназ республикайин жюрбежюр пIипIариан инсанар гъафнийи.
Сабпи нубатнаъди, худул бицIидарин багъдиз гъадагъуз кюмек апIин кIури, Мягьячгъала шагьрин агьали Патимат Кагьирова депутатдихьна илтIикIнийи. Дугъан гафариинди, бицIир шагьрин 41-пи нумрайин бицIидарин багъдиз нубатнахъ дерккна. Гюрюшдиъ дуфнайи дишагьлийин улихь Алавудин Несрединовичди 41-пи нумрайин бицIидарин багъдин заведишдиз зенг гъапIнийи. Телефондиан вуйи гафариинди, гъябгъюрайи йисан июлин вазлиъ электрондин нубатниинди бицIир багъдиз гъадагъидича кIури, заведишди гаф тувнийи.
Гьаму жюрейин месэла гьял апIувал ккун апIури, депутатдихьна «Табасарандин нурар»газатдин редакцияйин гъуллугъчи — Раисат Шиховара илтIикIнийи. Р.Шиховайин гафариинди, дугъу чан велед 2017-пи йисхъан мина Мягьячгъалайиъ айи 11-пи нумрайин «Чебурашка» кIуру бицIидарин багъдиъ электрондин нубатнахъ дерккна. Шубуд йисандин арайиъ нубат али йишвлан зат гъеребшвундар. Гьаддиз дугъура депутатдихьан чаз гьаму месэла гьял апIуз кюмек ккун апIурайи. Фицики, учв ляхниъ ади, бицIир хулаъ гъитуз фужкIара адрувализ лигну, думу гьар вазлиъ 5 агъзур манаттIан артухъ пул туври, чан велед хусуси вуйи бицIидарин багъдиз гьауз мажбур шула. Дугъан месэла гьял апIбан бадали, А. Мирзабалаев багарихьди Мягьячгъала шагьрин образованиейин управлениейин пишекарра хъади улупнайи бицIидарин багъдиз гъягъбанди гъахьну.
Дербент шагьрин агьали Рамин Ибрагьимов силбар сагъ апIбан гьякьнаан вуйи месэла хьади депутатдихъди гюрюшди дуфнайи. Р.Ибрагьимовди мялум гъапIганси, думу уьмрин читин шартIариъ яшамиш шулайи кас ву. ИкибаштIан, силбар сагъ апIуз дугъаз дакьатарра адар. Алавудин Мирзабалаевди, му месэла гьял апIбан бадали, гюрюшдиз дуфнайи касдикан чав силбар сагъ ва гележегдиъ дурар сагъ апIбан ляхин давам апIуз ккайи клиникайикан вуйи мялуматар хьади чахьна илтIикIуб ккун гъапIну.
